Espainiako Auzitegi Nazionaleko 5. Instrukzioko Epaitegiak, Santiago Pedraz epailearen ardurapean, erabaki du Acción y Comunicación sobre Oriente Medio (ACOM) elkarteak aurkeztutako salaketa bat ikertzeko eginbideak irekitzea. Salaketa horrek dio "gorroto-delituak", "desordena publikoak", "lesioak" eta "bide-segurtasunaren aurkako atentatuak" izan direla azken egunetan, Israel Premier Tech taldea Espainiako Vueltan egotearen aurkako protestekin loturik. Fiskaltzari igorri zaio kasua jada, auzitegiaren esku-hartzea eta eskumena balora ditzan, iturri juridikoak eztabaidatzen ari baitira haren jurisdikzioaren inguruan.

ACOMek Palestinaren Okupazioaren aurkako Sare Solidarioa (RESCOP), Boikot, Desinbertsioak eta Zigorrak (BDS) eta Israeli Kirol Boikota egiteko Plataforma bezalako kolektiboei egozten die "blokeoak eta jazarpena" barne hartzen dituzten protestak antolatzea. Bestalde EH Bildu, Podemos, Izquierda Unida eta Sumar alderdiak aipatu ditu besteak beste, "talde israeldarra baztertzearen sustatzaile aktibo gisa"; eta ekitaldiaren antolakuntzari leporatu dio, Kiko Garcia zuzendari teknikoari barne, "ekintza horiek legitimatzea".

Era berean, salaketak "erantzukizuna" eskatzen die Espainiako Gobernuari eta agintariei, bereziki Atzerri ministro Jose Manuel Albaresi eta Gazteria eta Haurtzaro ministro Sira Regori, genozidioa zuritzen duen txirrindularitza-taldea "kanporatzearen aldeko jarrerak" hartzeagatik eta "lehiaketan ordena eta segurtasuna ez bermatzeagatik".

Prozedura judizial hau Israel Premier Techen parte-hartzeak Vueltan sortu duen tentsio politiko eta sozialaren erdian iritsi da, manifestaldi etengabeak izan baitira lasterketaren ohiko garapena geldituz. Estatu genozidako txirrindularien parte-hartzea zalantzan jarri du horrek guztiak.