"Nik lasai bizi nahi dut, ondo bizi". Guardia Zibileko sarjentu Jose Romero Bejarrek, El Moro ezizenekoak, horrela justifikatu zuen delituak egin izana. Intxaurrondoko (Donostia, Gipuzkoa) kuartelean urterik gogorrenetan trebatutako agente beteranoak bi urteko espetxe-zigorra onartu zuen 2025ean, narkotrafikatzaileei Gibraltargo itsasarteko patruilen mugimenduei buruzko informazioa emateagatik.

Romero Bejar Ceutan jaio zen 1959an, eta 20 urte besterik ez zituela sartu zen Guardia Zibilean. 80ko hamarkadan Intxaurrondoko kuartelera bidali zuten, tortura eta bortxaketa bortitzengatik ezaguna, Enrique Rodriguez Galindo jeneralaren agindupean. ETAren aurkako gerra zikinean funtsezkoa izan zen Rodriguez Galindo, eta Lasaren eta Zabalaren bahiketagatik eta hilketagatik kondenatu zuten gero. Romerok, hain zuzen ere, GALen sumarioan deklaratu behar izan zuen Baltasar Garzon epailearen aurrean, baina ez zuten inputatu.

Bere azken lantokiak, 2015ean Tarifan, "urrezko erretiroa" zirudien. Baina, handik hilabete eskasera, drogaren aurkako operazio batek barne-filtrazioak izan zirela erakutsi zuen. Ikerketak agerian utzi zuen, hala, sarjentuak berak ematen ziela patruilen ibilbideari eta ordutegiari buruzko informazioa narko-taldeei, ezkutuan haxix tonak mugitu ahal izateko.

80ko hamarkadako zenbait txostenek agenteen eta kontrabandoko mafien arteko loturez ohartarazten zuten jada. Bere mendekoen mugimenduak kontrolatzearekin obsesionatuta zegoen buru bat deskribatzen dute barne-txostenek, baita "oporretan egonda ere". Informazioa narko-sareei saltzeko aukera ematen zion horrek.

Barne-ikerketek, gainera, luxuzko jatetxeetan egindako otorduak, bidaiak, safariak, zaldiak eta zilindrada handiko motorrak aurkitu zituen Romeroren egunerokoan. Epailearen aginduz grabatutako elkarrizketa batean, urtean 70.000 eurorainoko gastuak eduki izana onartzen zuen sarjentuak: "Horretarako sartu naiz nahas-mahas honetan", zioen.

2016ko azaroan atxilotu zuten, hainbat konplizerekin batera, baina kasua geldotasun judizialaren eta adostasun-itunen artean galtzen ikusi zuen Romerok. 2025eko apirilean, gertakariak aitortu zituen: osasun publikoaren aurkako delitu bat egin izana onartu zuen, haxix-trafikoa nabarmen errazteagatik. 3,3 milioiko isuna jarri zioten, baina kartzelan sartu gabe.