Udaltzaingoa eta eraikuntza arloko enpresa bat atzo bertaratu ziren Olarizu auzora, etxebizitzak hormatzen jarraitzeko; hala, bi bizilagun etxegabetu zituzten. Okupatuta dauden azkeneko etxebizitzak hustea da udalaren asmoa, eta aurki jarriko du martxan eskabidea epaitegietan.
Gasteizko Udalak Olarizuko etxebizitza okupatuak haien "borondatez" uzteko agindua eman zien bizilagunei, eta aurreko astean amaitu zen horretarako ezarritako epea. Horren harira, atzo bertaratu ziren auzora udaltzainak, eraikuntza arloan lan egiten duen enpresa bateko langileekin, etxe gehiago hustu eta ateak hormatzeko asmoz. Harriz estali zituzten bi etxebizitzatako sarbideak, eta modu horretan kaleratu zituzten han bizi ziren bi emakume. Auzotik alde egin behar izan zuten.
Olarizun bizitzen jarraitzen duten pertsonek salatu dutenez, gero eta jende gutxiago bizi da auzoko etxe okupatuetan. Poliziaren laguntzaz, etxebizitzak husten jarraitzen du udalak, etxegabetutakoei inolako alternatibarik eskaini gabe.
Udalaren asmoa da okupatuta dauden azkeneko etxebizitzak ere desalojatzea, eta epaitegietara joko du horretarako. Aurreko astean jakinarazi zuten aste honetan abiatuko zela eskabidea epaitegietan.
