Duela gutxi eman dute Lekeitioko (Bizkaia) Uribarren Abaroa egoitzako langileen egoeraren berri: "laneko segurtasuna bermatzeko beharrezko materiala ez izatea, kontratazio faltaren ondoriozko lan-erritmo jasangaitzak, praktiketako pertsonala soldatapekoen funtzioak betetzen egotea, bajak eta eszedentziak betetzeko langilerik ez kontratatzea, egutegi aldaketak jakinarazteko lan-hitzarmenean zehaztutako denborak ez betetzea, kategoria altuagoko eginkizunak eta erantzukizunak bete behar izatea horiei dagokien lansaririk kobratu gabe, lan-hitzarmenean hitzartutako atsedenerako denbora ez errespetatzea eta abar". Hori gutxi balitz, "gerentziaren aldetik ohikoak dira mehatxuak, presioak, langileon arteko etsaitasunak sortzeko saiakerak, xantaiak eta antzeko praktikak".

Egoitzako beharginek eta Lea-Artibaiko Laneko Autodefentsa Sareak hilabetearen erdialdean egin zuten agerraldi bat hori guztia azaltzeko, eta borrokara jo dutela jakinarazi zuten. Lau aldarri zehatz egin dituzte: langile gehiago kontratatzea, argudiatuta bestela ezin dela zerbitzu egokirik eskaini; egoitzan ustez indarrean dagoen lan-hitzarmena betetzea, "hainbat puntu sistematikoki urratzen" direlako; lan egiteko beharrezkoak diren "material eta baliabide egokiak ziurtatzea", eta "gerentziaren aldetik dagoen lan-jazarpena gelditzea".

Joan den larunbatean, maiatzaren 20an, aurreneko protesta bat egin zuten Lekeitioko udaletxeko eskaileretan. Jende ugari elkartu zen han, "erresidentzian gutxieneko lan-baldintzak bermatzearen eta langileon ahotsa ordezkatuta egotearen alde".

Besteak beste, instituzio publikoen erantzukizuna seinalatu zuten berriz; esaterako, Lekeitioko Udalarena. "Lekeitioko udal ordezkariak, [Uribarren Abaroa] fundazioaren parte den neurrian, gerentziaren kontratazioaren eta, ondorioz, enpresaren gestioaren gaineko erantzukizun zuzena dauka", adierazi zuten maiatzaren erdialdean egindako agerraldian.

"Egoera aldatu arte borrokak jarraituko du, eta babesa ematen jarraitzeko deia egiten dugu", gaineratu zuten egoitzako langileek eta Laneko Autodefentsa Sareko kideek asteburuan.