Herri Unibertsitatea dela-eta, 14:00etan egin dute gaur asteazkeneroko elkarretaratzea. Dozenaka lagun bildu dira gaur ere 'Unibertsitateko kostuak doan' lelopean.
Arte Ederretako elkarretaratzea, gaur. Argazkia: UIB
Unibertsitateko Indar Batasunak deituta, dozenaka pertsona elkartu dira laugarren astez Leioako (Bizkaia) campuseko Arte Ederren Fakultatean. Unibertsitateko kostuak doan leloa zeraman pankartaren atzean mobilizatu dira gaurkoan ere, 14:00etan, campusean egiten ari diren Herri Unibertsitatea dela-eta. Hala, UIBk berriro salatu du eskola materialaren "gehiegizko kostua", elkarretaratze bidez.
Kostuak borrokatzen
Arte Ederretako ikasleek lehen salaketa ekintzetatik adierazi izan dutenez, materiala erosteko, 600 eurotik gora gastatzen dituzte graduko lehen bi ikasturteetan. Abenduaren 12an, EHUko hainbat campusetara eraman zuen UIBk Arte Ederretako ikasleen aldarria. UIBk azaldu zuenez, Bologna modura ezaguna den prozesura batu zenetik, EHUrentzat pisua irabazi dute ikasleen tasek. Izan ere, 2013tik 2017ra bitartean, hazi egin ziren EHUk ikasleen tasen bidez jasotako diru-sarrerak; 32 milioi euro biltzetik, 47 milioi euro biltzera igaro zen.
Kostu horiek murriztea helburu,
eskakizun formalak egiten eta problematika sozializatzen jardun dute azken hilabeteetan Arte Ederretako ikasleek. Iragan abenduan, gainera, ikasleentzako tasen eta beken baldintzak aldatzeko kanpaina jarri zuen martxan Unibertsitateko Indar Batasunak.
