ACTUALIDAD
Iruñean jarduten zuen guardia zibil bat kondenatu berri dute, bere bikotekidea bortxatzeagatik eta tratu txarrak emateagatik. Noticias de Navarra-ren arabera, hamalau urte eta erdiko kartzela-zigorra ezarri diote agenteari: hamabi urtekoa "bortizkeria eta intimidazioa erabilita sexu-erasoak" egiteagatik, eta bi urte eta erdikoa "ohiko tratu txarrengatik". Egunkari berak jaso duenez, %52ko desgaitasuna dauka biktimak.
Hala ere, prozesu judizialean mahaira ateratako beste delitu batetik errugabetu egin dute guardia zibila: ez dute "sekretuen aurkikuntza" leporatuta zigortu. Agentea gutxienez bost aldiz sartu zen polizia-indarren datu-basean, emakumeari buruzko informazioa eskuratzeko, horretarako justifikaziorik eta baimen ofizialik gabe. Epaileak ebatzi du, dena den, ez dagoela frogatuta gizona biktimaren datu "pertsonal eta intimoetara" sartu zenik, eta absolbitu egin du delitu horri dagokionez.
Prozesu judizialean aipatu dute agenteak "kontrol gogorra" inposatu ziola bere bikotekideari, eta senideengandik eta lagunengandik urrundu zuela. Gainera, geolokalizazio-gailu bat ipini zion autoan.
