24 urte kartzelan eman ostean, hirugarren graduan sartu dute Fernando Alonso Abad euskal preso politiko sestaoarra, eta ez du kartzelan lo egin beharko. Bestalde, zortzi preso politiko lekualdatuko dituztela jakinarazi du Espainiako Espetxe Zuzendaritzak.
Fernando Alonso Abad, Martuteneko kartzelatik atera ostean. Argazkia: Sestaoko Sare
1996an atxilotu zuten Fernando Alonso Abad Egin egunkariko kazetaria, Andoni Murga Zenarruzabeitiarekin batera. Ordutik Espainiako Estatuko hainbat kartzelatan izan dute aldenduta, Alacanten, Pontevedran eta Leonen, adibidez.
Apirilean onartu zuten hirugarren graduan sartzea eta Martutenera (Gipuzkoa) tokialdatzea, baina pandemia aitzaki hartuta, hiru hilabete gehiago eman zituen Villabonan (Asturias). Andoni Murgak Zueran (Zaragoza) jarraitzen du preso.
Lekualdatzeak
Zortzi euskal preso politikoren lekualdatzeen berri eman du, bestalde, Espainiako Espetxe Zuzendaritzak: Karmelo Lauzirika eta Jose Juan Garcia Gonzalez Zaballako (Araba) espetxera aldatuko dituzte, eta Espainiako beste kartzela batzuetara eramango dituzte Jose Antonio Borde
Gaztelumendi, Ibai eta Mikel Xabier Aiensa Laborda, Itziar Alberdi, Juan
Jesus Narvaez eta Aitor
Esnaola Dorronsoro.
