Euskal Herrian, Etxebizitza Sindikatuek ere bat egin dute azaroaren 11n greba orokorrera jotzeko deialdiarekin. Aste honetan jakin da 24 orduko greba batera deituko zutela CCOOk eta UGTk, eta Euskal Herrian ESK, ELA eta LABek deialdiarekin bat egin ostean, Etxebizitza Sindikatuek ere jakinarazi dute parte hartuko dutela greban eta bere antolaketan.
"Une honetan, lan-arloko sindikatuekin hitz egiten ari gara, etxebizitza-eskubidearen aldeko greba orokorra antolatzeko. Gure helburua da etxebizitzaren aldeko mugimenduak rol protagonikoa izatea mobilizazio horietan, eta ildo horretan lan egingo dugu", zehaztu dute Etxebizitza Sindikatu Sozialistak eta Etxebizitza Sindikatuen Sareak.
Aldarrikatu dute etxebizitzak "eskubide bermatua" izan behar duela, baina, horretarako, ezinbestekoa dela "espekulazioa eta errentismoa erabat amaitzea". Ohartarazi dute, dena den, "helburu hori ez dela lortuko kanpaldi batekin edo greba batekin": beraz, azaroaren 11ko hitzorduaz harago, "antolatzeko eta borrokatzeko deia" egin dute Etxebizitza Sindikatuek.
"Langile-klasearen indarrak handitu behar ditugu, gehiago izan behar dugu, kontzientziatuago eta hobeto antolatuta egon behar dugu datozen hilabeteetan ireki daitekeen edozein agertokitan; bai eskuineko gobernu baten neurri atzerakoiei aurre egiteko, bai PSOEren gobernu berri bat egongo balitz benetako hobekuntzak behartzeko", gaineratu dute. Laster emango dute greba orokorrari buruzko xehetasunen berri.
