Maiatzean epaitu zituzten, Ertzaintzak "desobedientzia-falta larri bat" leporatu ostean. 2022an protesta-ekintza bat egin zuten auzipetuek Bilboko Gobernu Militarrean.
2022ko apirilean, protesta-ekintza bat egin zuten lau pertsonak Bilboko (Bizkaia) Gobernu Militarrean: Juan de Garayko kuarteleko hormetara igo eta katez lotu ziren, estatuaren gastu militar izugarria salatzeko. "Gastu militarra: 43.000 milioi euro" eta "#EragozpenFiskala" mezuak irakur zitezkeen antimilitaristek erakutsitako pankartetan.
Gastu militarraren aurkako eragozpen fiskalaren kanpaina baten barruan egin zuten ekintza hori lau kideek, KEM-MOC Talde Antimilitaristak azaldu duenez. Salatu du, gainera, ekintza hori izan zenetik, igo besterik ez dela egin gastu militarra: 60.576,75 milioi eurora heldu zen 2023an, esaterako.
Epaiketa maiatzean
Ertzaintzak "desobedientzia-falta larri bat" egotzi zien ekintzan parte hartu zuten bi antimilitaristari. Horren harira, joan den maiatzean epaitu zituzten Bilbon. KEM-MOCek atzo jakinarazi zuen, ordea, absolbitu egin dituztela biak. 700 euroko isun bat eskatzen zuten euren kontra, baina zigorrik ez jartzea erabaki dute 3. eta 4. instrukzio-epaitegietako magistratuek.
