Langile etorkinak esplotatzen zituen sare bat atzeman dute berriki, eta hiru pertsona atxilotu dituzte desegite-operazioaren barruan; bat Araban eta beste bat Bizkaian. Euskal Herrian eta Espainiako Estatuko iparraldeko hainbat lurraldetan jarduten zuten sarean harrapatutako beharginek, igeltsero-lanetan batik bat. Gutxienez 41 langile esplotatzen zituzten bertan; Asiakoak dira jatorriz, eta goizero Gasteizen (Araba) elkartu ostean eramaten zituzten lanera, hamaika obratara.

Berria-k jaso duenez, ikerketaren barruan, hamar lanetako mugimenduak aztertu dituzte iazko abuztutik hona, eta horietatik zazpitan topatu dituzte "irregulartasunak". Hiru egoitza ere miatu dituzte ikerketari lotuta. Gaur-gaurkoz, Santanderko epaitegi baten esku dago auzia.

Itxura denez, esplotazio-sareko arduradunetako baten lana zen Asian beharginak erakartzea, lan-eskaintzak eginez. Gero, modu irregularrean mugiarazten zituzten erakarritako langileak, eta esplotatzaileekin 30.000 eurorainoko zorra zutela esaten zieten. Une honetan esplotatuak izaten ari ziren 41 langileetatik 40 daude egoera administratibo irregularrean.