Euskal Herria, Galizia, Madril eta ia Katalunia osoa ekiditen dituen ibilbide baten alde egin du 81. edizioak. Aurten, hainbat etapa bertan behera uztea lortu dute Palestinaren aldeko protestek.
ARGAZKIA / as.com
Espainiako Vueltaren 81. edizioa, Monakon aurkeztua, deigarria izan da bere mapa politiko inplizitu berriagatik: ez da igaroko azken urteetan Palestinaren aldeko protestak eta blokeoak izan diren lurraldeetatik. Monakotik abiatu eta Pirinioak zeharkatuko dituen ibilbidea Andaluziako lurraldean mantenduko da azken zatian, Granadan amaituz. Kontrara, ez ditu zeharkatuko Euskal Herria, Galizia, Madril eta Kataluniako zati handi bat.
Datorren edizioaren izaera "nazioartekoa, menditsua eta teknikoa" azpimarratu dute antolatzaileek, baina diseinuak agerian utzi du gatazka politikoko eta mediatikoko gertakariak saihesteko asmoa. Izan ere, aurtengo edizioan hainbat etapa markatu dituzte Palestinaren aldeko mobilizazioek, horietako batzuk bertan behera utzi behar izan baitituzte, Bilbokoa (Bizkaia) kasu.
Vueltako zuzendaritzaren gertuko iturriek pribatuan diotenez, diseinuak kirol-irizpideei erantzuten die batez ere, "hamarkadako ediziorik gogorrena" bilatu baitute, 58.000 metroko desnibelarekin; baina aitortzen dute faktore politikoak ere garrantzia handia izan duela zenbait lurralde ekiditeko hautaketan.
Lehen Israel Premier Tech (IPT) bezala ezagutzen zen talde sionistak izen berri bat hartu du orain, NSN Cycling Team, genozidiotik aldentzen saiatzeko berregituraketan eta aldaketan. NSNk ia ziurtatuta dauka 2026ko Vueltan parte hartzea, protesta berriei ateak zabalik utziz.
