Aurreko ostiralean egin zuten agerraldi jendetsu bat Iruñeko (Nafarroa) Txantrea auzoan, Txozna Gorriak arriskuan daudela salatzeko. Izan ere, hiru urte daramatzate Txantreako festetan Txozna Gorriak jartzen, baina ekimena zalantzan jarri du orain EH Bildu buru duen Iruñeko Udalak: momentuz, uko egin die Txozna Gorriak ipintzeko baimenei. Horretarako, udalak eta auzoetako hainbat jai-batzordek daukaten lankidetza-hitzarmena erabili du aitzakia modura udal-gobernuak: jai-batzorde horiei soilik aitortu nahi die "jaien testuinguruan antolatzen diren ekimen soziokultural bakoitzaren baimenak eskatzeko eta jakinarazteko" funtzioa, eta ez die eskubide hori aitortu nahi Txozna Gorriei.

Txozna Gorrietatik aurtengo jai-gunea antolatzeko beharrezko baimenak eskatzean, ezezkoa eman die udalak: txozna horiek "hitzarmenetik kanpo geratzen direla argudiatu" eta "Txantreako jaietan gune bakarra egotea hobesten" duela esan du udal-gobernuak, ostiraleko agerraldian jakinarazi zutenez. Hori, baina, urrun dago Txantreako festetan azken urteetan ikusi den errealitatetik: "Azken urteetan lau jaigune izan dira auzoko jaietan, eta bakoitzak bere ekarpena egin dio jaien eskaintza kultural orokorrari. Esperientzia hori modu baikorrean baloratua izan delakoan gaude, eta horregatik zaigu hain ulergaitza auzoko jaiak gune bakar batera murrizteko irizpide berri hau". Salatu dute, gainera, udalak ez duela inposatu nahi duen irizpide hori jaien antolaketan parte hartzen duten kolektibo guztiekin adostu.

"Zaila da ulertzeko jaietan beren ekarpena egin nahi duten elkarte, kolektibo edo eragileen parte-hartzea mugatzeko hautua", esan zuten agerraldian. Eta seinalatu zuten, urte honetan, "arriskuan den gune bakarra Txozna Gorriena" dela. Horiek horrela, udalari exijitu zioten "Txantreako jaiak ezaugarritu dituen izaera herrikoi eta parte-hartzailea errespetatu dezala", eta "Euskara Plazari bizia eman dion Txozna Gorrien gunea baimendu dezala".

Prentsaurrekoan balioan jarri zuten azken hiru urteetan egindako lana; "jaiak antolatzen eta txantrear orori gune politizatu bat eskaintzen, auzolanean eta hamarnaka kuadrilaren parte-hartzearekin". Horiek horrela, Txozna Gorrien defentsan eta festetan parte hartzeko eskubidearen alde, mobilizazio bat egingo dute apirilaren 12an.