Tubos Reunidos enpresak jakinarazi du enplegu-erregulazioko espediente bat irekiko duela, Amurrion (Araba) eta Trapagaranen (Bizkaia) dituen lantegiei eragingo diena. 1.300 langile inguru ditu bertan. Zuzendaritzak, El Correo-k azaldu duenez, "egoera ekonomiko konplexuagatik" eta nazioarteko testuinguruagatik justifikatzen du neurria, eta badirudi ez duela haren irismena zehaztuko otsailaren 9ko bilerara arte. Berria-k eta El Correo-k aipatutako iturri sindikalen arabera, proposamenak langileen %35 eta %40 artean jar ditzake arriskuan, eta horrek 455 eta 520 enplegu artean suntsitzea ekarriko luke, gutxieneko ehuneko legala %10 izanik (130 lanpostu).

Enpresako zuzendaritzak Donald Trumpen administrazioak altzairu-inportazioei ezarritako "%50eko muga-zergen eraginari" egotzi dio bere egoera kritikoa, Estatu Batuetan saltzea "bideraezina" izango litzatekeela argudiatuta. Salmenten %45 (767 milioi euro) hartzen omen zuen AEBetako merkatuak. El Correo-ren esanetan, enpresak galera larriak ditu (28 milioi lehen seihilekoan) eta 250 milioi eurotik gorako zorra, nahiz eta 2021ean Estatuko Industria Partaidetzarako Sozietateak (SEPI) erreskatatu zuen 112 milioiko injekzioarekin.

Sindikatuen erantzuna

Bi lantegietako enpresa-batzordeek, ELA buru duen negoziazio-batzorde bateratu batean sartuta, aho batez baztertu dute enplegu-erregulazioko espedientea. Lehenengo erantzun gisa, Amurrioko batzordeak, ELA, LAB eta ESK sindikatuen babesarekin, bi greba-egunetara deitu du otsailaren 9rako eta 13rako. Trapagaranen, Berria-ren arabera, LAB eta ESK sindikatuek baino ez dute berehalako mobilizazioen alde egin, eta ELAk nahiago du "murrizketen eragin zehatza ezagutu arte itxaron". Sindikatuek, gainera, kritikatu dute enpresak bi lantegietarako espediente bakarra negoziatzea eskatzen duela, biek hitzarmen eta produktu desberdinak dituzten arren.

Enpresa ezegonkortasun-egoera batean murgilduta dagoenean heldu da kaleratzeen iragarpena, izan ere, oraintsu aldatu dute konpainiako presidentea; eta Espainiako Auzitegi Nazionalak deitu du berriki, SEPIko eta PSOEko goi-kargudun ohiak inplikatzen dituen legez kanpoko komisioen sare bati buruzko ikerketan. Langileek zalantzan jarri dute enpresak "borondatezko irteerak" ordaintzeko funtsak dituenik, nahiz eta zuzendaritzak hori planteatu duen lehen neurri modura. Beraz, kaleratze zuzenen beldur dira beharginak, horrek lantegien ekoizpen-ahalmena izugarri mugatuko lukeela ere kontuan hartuta.