Bi greba egunetara deitu dute Galdakaoko osasun-langileek, gaurko eta biharko. Soldatak Osakidetzako gainontzeko langileen soldatekin berdintzea da haien helburu nagusia.
Galdakaoko Transfusio eta Giza-ehunen Euskal Zentroko langileen elkarretaratzea, gaur. Argazkia: ELA
Transfusio eta Giza-ehunen Euskal Zentroko (TGEEZ) langileek "soldata-diskriminazioaren" aurka egin dute greba gaur. Biharko, abenduaren 10erako, bigarren lanuzte egun batera deitu dute. Martxotik mobilizatu dira eta azaroaren 25ean egin zuten greba deialdia, zuzendaritzaren negoziatzeko "gaitasunik ezari" aurre egiteko, bai eta Osakidetzak proposatutako neurriak ez zetozelako bat langileen eskakizunekin.
Funtsean Osakidetzako gainontzeko langileen soldata berdinak lortzea dute helburu beharginek. Haien esanetan, "guztiz integratuta dago" TGEEZ ospitaleen sisteman, eta erakunde publikoak ere hala onartu duela diote. Hala, gainontzeko langileekin parekatzea exijitzen dute, eta salatzen dute soldataren osagarri den %4ko gehigarria zor zaiela.
Hori ez ezik, TGEEZko langileek "sistematikoki aplikatutako murrizketak" etetea exijitu dute, bai langileak bai pazienteak kaltetzen dituztela argudiatuta.
