1980an gutxienez hiru pertsona torturatu zituen Bartzelonan, eta, bere agintaritzapean, Espainiako Poliziak gutxienez 100 laguni egin zizkien torturak Gipuzkoan 1992tik 1999ra bitartean.
ARGAZKIA / X-tik hartutakoa
Benetako gertakarietan oinarritutako film bat da berriki saritutako La infiltrada. Pelikulan ikusten da nola Espainiako Poliziako buru batek agintzen dion Elena Tejadari (Carolina Yustek antzeztua) ETAn infiltratzeko, eta nola bera den infiltrazioaren jarraipena egiten duena. Duela gutxira arte, ezkutuan mantendu dute filmean Luis Tosar aktoreak hezurmamitzen duen polizia-buru horren benetako nortasuna, baina oraintsu atera du argitara El Mundo-k: bizitza errealean, Fernando Sainz Merino komisarioa izan zen infiltrazio horren ezkutuko arduraduna.
Tosarrek berak hainbat elkarrizketatan azaldu duenez, pelikulan berak antzezten duen polizia "anonimoa" Inhumanoa ezizenez ezagutzen zuten lehen polizia-etxeetan; ustez, "agenteak ordu txarretan esnatzen zituelako eta oso aktiboa zelako". Baina aktoreak esan ez duena da Sainz Merino behin baino gehiagotan seinalatu dutela torturatzaile modura, bai Katalunian bai Euskal Herrian.
1980an Bartzelonan atxilotutako hiru militante independentista (Exèrcit Popular Català taldeko Antoni Massagué, Ferran Jabardo eta Xavier Barberá) izan ziren agente hori identifikatzen lehenengoak, beste lau poliziarekin batera haiei egindako torturengatik. Via Laietanako komisarian atxiki eta torturatu zituzten, atentatu baten egiletza euren gain har zezaten. Bartzelonako auzitegi batek antolatutako identifikazio-saio batean, torturatzailea ezagutu zuten biktimek.
Une horretan, Sainz Merinok sei urte zeramatzan polizia izaten; 1974an sartu zen Espainiako Polizian, frankismo garaian oraindik. Azkenean, ez zen izan Bartzelonan salatutako torturengatiko epaiketarik Espainiako Estatuan, baina biktimek Giza-Eskubideen Europako Auzitegira eraman zuten auzia, eta arrazoia eman zien hark.
Gipuzkoan, gutxienez 100 tortura kasu
Gertakari horietatik denbora batera, 1992tik 1999ra bitartean, Sainz Merinok Gipuzkoan jardun zuen Espainiako Poliziako buru gisa, ETAren aurkako lanean nagusiki. Horretan besoz beso aritu zen Guardia Zibileko Enrique Rodriguez Galindo ezagunarekin. Garai hartan, eta hortaz bere agintaritzapean, ugariak izan ziren Gipuzkoan Espainiako Poliziak torturatutako pertsonak: 100 bat, gutxienez.
Sainz Merino 1998an igo zuten karguz, "terrorismoaren aurkako aholkulari" izendatu baitzuten Polizian. Hasieran, Gipuzkoako ardurarekin uztartu zuen lan hori, baina bigarren izendapenean zentratu zen gero. 2002an itzuli zen Gipuzkoako kargura, eta EAEko buru nagusia izan zen 2012tik 2013ra bitartean. Gaur egun jubilatuta dago.
