Martxoaren 22an gertatu zen sexu-erasoa, Iruñean (Nafarroa), Billabesa autobus-zerbitzuko 16. linean. Gizonezko batek, azken bidaia zela baliatuta, eraso egin zion gidariari. TTC enpresako berdintasun batzordeak atzoko elkarretaratzean azpimarratu zuenez, sexu-eraso gisa jasotzeko eta zigortzeko kasu bat izan da. Erasotua izan zen emakume langileak salaketa bat jarri du, eta langileek salatu zuten azkenaldian gora egin dutela haien aurkako erasoek.

"Protokolo eraginkorrak" aplikatzeko beharra ere nabarmendu zuten, erasoei aurre egiteko baliabide eskasia dela-eta. Adibidez, azaldu zuten izu-botoiak ez zuela funtzionatu erasoa izan zen unean, eta ez dituztela egokitu langileek aspalditik eskatzen dituzten manparak erasoetatik babesteko.

Langileen esanetan, aisialdi-ohituren aldaketek eragin dute, gaur egun, lineetako azken bidaietan jasatea lehen goizaldean izaten ziren erasoak, gidarien zaurgarritasunaz baliatuta. Hala, TTC enpresari erasoen aurkako protokoloa eguneratzeko eskatu diote.