Hamahiru urteko ibilbidearen ostean hustu dute espazioa. Desalojoa salatzeko, manifestazio bat izango da arratsaldeko 19:00etan.
ARGAZKIA / Alerta Gorria Irratia
Sestaoko (Bizkaia) Txirbilenea Kulturguneko kideek aurreko astean azaldu zuten hurbil egon zitekeela espazioaren desalojoa, hainbat pertsona susmagarri ikusi zituztelako inguruan. Izatez, martxoaren 18tik egon da berehalako huste arriskuan, esan baitzieten hilabeteko epea zutela lekua husteko. Eta, azkenerako, gaur goizean eman dute abisua bertako kideek: Polizia bertan zela eta Txirbilenea husten ari zirela jakinarazi dute.
Ertzaintzak goizeko 09:00ak aldera ekin dio operazioari, epailearen agindua betez. Inguruko kaleak itxi, eta espazioa zarratzeko eta hormatzeko lanak hasi dituzte polizia-indarrek. EAJ buru duen udala da eraikinaren jabe legala, eta hark abiatu zuen Txirbilenea husteko prozesua. Teilapea eta fatxadak birgaitzeko obra bat hartu du aitzakiatzat tokia husteko, baita eraikinak omen dakarren "arriskua" ere.
Txirbileneak hamahiru urte daramatza martxan, bere garaian eskola izandako eraikin batean. "Segurtasunari" lotutako arrazoiez baliatuta, udal-gobernua iazko urrian ere saiatu zen espazioa husten. Gaurko desalojoa salatzeko, mobilizazio bat antolatu dute: arratsaldeko 19:00etan hasiko da Sestaoko 3K Plazatik.
