Ia 13 milioi pertsona daude pobrezian erortzeko arriskuan Espainiako Estatuan, eta dirulaguntza jasotzeko onartutako eskaerak ez dira bi milioira heltzen. Laguntzaren batez besteko zenbatekoa 116 eurokoa da pertsona heldu bakoitzeko, eta 69 eurokoa haur bakoitzeko.
Pasa den abuztuan, 1.957.700 pertsonak jaso zuten Bizitzeko Gutxieneko Diru-sarrera (BGDs) Espainiako Estatuan, Gizarte Segurantzaren Institutu Nazionalaren (INSS, gaztelerazko sigletan) azken txostenaren arabera. Espainiako Estatuko gobernu ezkertiarrak sortu zuen dirulaguntza hori 2020an, ustez "pobrezia eta gizarte-bazterketa arriskuan daudenei, edota egon daitezkeenei, egoera horretatik ateratzen laguntzeko" helburuarekin.
Aurtengo abuztuan dirulaguntza jaso duten familia-unitateen artean, %67,43 dira adingaberen bat euren kargu daukatenak. Horien artean, 111.958 dira guraso bakarreko familiak. BGDs-ren zenbatekoa 460 eta 1.000 euro artean kokatzen den arren, batez beste 479,2 euro baino ez dira jasotzen familia bakoitzeko; hau da, 116 euro pertsonako. Laguntzak familia bateko adingabe kopuruaren araberako diru-kantitate osagarri bat ere aurreikusten du, iragan den hilean, adingabe bakoitzeko 68,23 eurokoa izan dena, batez beste.
BGDs-ren zenbatekoa 460 eta 1.000 euro artean kokatzen den arren, batez beste 479,2 euro baino ez dira jasotzen familia bakoitzeko; hau da, 116 euro pertsonako
Neurri horren eraginkortasun-maila azaleratzen laguntzeko, Espainiako Estatuan, Pobrezia eta Gizarte-bazterketaren Aurkako Sareak (EAPN-ES, gaztelerazko sigletan) kaleraturiko Pobreziaren Egoera Espainian, XIV. txostena nahiko adierazgarria izan daiteke. Txostenak dioenez, Espainiako Estatuko biztanleen laurdena baino gehiago (%26,5), hots, 12,8 milioi pertsona, pobrezia edota gizarte-bazterketa arriskuan daude. Soilik urtebetean, 2022tik 2023ra bitarte, 400.000 lagun gehitu ziren egoera horretara.
Espainiako Estatuko biztanleen laurdena baino gehiago (%26,5), hots, 12,8 milioi pertsona, pobrezia edota gizarte-bazterketa arriskuan daude
Horretaz gain, biztanleriaren erdiak (%48,7) hilabete amaierara heltzeko arazo larriak ditu. BGDs jaso dutenak 1.957.700 izan badira abuztuan, eta 12,8 milioi pertsona baino gehiago bizi badira pobrezia edo gizarte-bazterketa arriskuan, dirulaguntza ez da bere hartzaile objektiboen %15era ere iristen. Azken datu erabilgarrien arabera, BGDs sortu zenetik 2023ra arte bederen, laguntza jasotzeko egindako lau eskaeratatik hiru ukatuak izan dira.
BGDs sortu zenetik 2023ra arte [...], laguntza jasotzeko egindako lau eskaeratatik hiru ukatuak izan dira
