Petronorreko zuzendaritzak apirilaren 2an aurkeztu zuen Muskizko (Bizkaia) plantan ezarri nahi duen aldi baterako lan-erregulazioko espedientea. 350 langileri eragin diezaieke neurriak, alegia, langileen herenari.

Ostiral eguerdian Muskizen mobilizatu ziren Petronorreko beharginak, zuzendaritzaren erabakia gaitzesteko eta espedientea geldiarazteko asmoz. 13:30ean atera zen manifestazioa lantegi petrokimikoko instalazioetatik, eta enpresaren bulegoak dauden gunetik igaro zen, besteak beste.

Sindikatuen arabera, enplegu-erregulazioko espedientea ez dago nahikoa arrazoituta. Asteartean bildu ziren enpresako langileak, zer egin aztertzeko eta erabakitzeko. Hala adostu zuten mobilizazioak noiz egingo dituzten.

Besteak beste, lanuzteak egingo dituzte bihar, apirilaren 14an nahiz apirilaren 19an. Protestak ere izango dira datozen egunetan, esaterako, findegian elkarretaratuko dira bihar zein hilaren 14an, eta manifestaziora deitu dute hilaren 19rako. Apirilaren 21ean, aldiz, lanuztea egingo dute 11:00etatik 13:00etara, eta Eusko Jaurlaritzak Bilbon (Bizkaia) duen egoitzaren aurrean bilduko dira.