Eusko Legebiltzarrera eraman dituzte sinadura guztiak, gaur egungo pentsioak osatzeko neurriak exijitzeko.
ARGAZKIA / Arabako Pentsionistak Lanean
Euskal Herriko Pentsiodunen Mugimenduak (EHPM) urtearen hasieran ekin zion sinadura-bilketa bati, pentsioak hobetzearen alde. Modu horretan, 145.142 pertsonaren babesa lortu du, eta atzo bertan entregatu zituen bildutako sinadura guztiak Eusko Legebiltzarrean, Gasteizen (Araba). Manifestazio jendetsu bat egin ostean eman zituzten sinadurak, gaur egungo pentsioak hobetzeko neurriak eskatzeko.
Hain zuzen ere, pentsioen osagarria bermatzeko herri-ekimen legegile bat martxan jar dezala exijitzen diote gobernuari, gutxien-gutxienean, ezarritako pentsio minimoa Espainiako Estatuan markatutako Lanbide Arteko Gutxieneko Soldataren (SMI, gazteleraz) parekoa izan dadin (hilean 1.184 eurokoa da gaur egun, urtean hamalau ordainsaritan bereizita). Euskal Herriko pentsiodunek urteak daramatzate "pentsio duinak" aldarrikatzen eta hobekuntzak lortzeko borrokan, eta azaldu dute "babes ikusgarria, historikoa" lortu dutela aurtengo sinadura-bilketan.
Errubrikak ofizialki balioztatu beharko dituzte orain, eta ontzat emanez gero, osoko bilkura batera deituko dute Eusko Legebiltzarra, pentsioen osagarria bermatzeko herri-ekimenari buruzko bozketa egiteko. Argia-k jaso duenez, EHPMk aurreikusten du hurrengo udazkenean izango dela osoko bilkura hori. Gaineratu duenez, pentsioak osatzeko neurriak aurrera egingo balu, 100.000 pentsiodunik "prekarioenen" baldintzak hobetuko lirateke; horietatik 65.000 emakumezkoak dira.
