Ezegonkortasunak markatutako ekonomia globalaren erdian, gatazka belikoek irabazi-faktore izaten jarraitzen dute potentzia nagusientzat, eta horrela, haientzat negozio saihestezin modura ageri da gerra. Military Spending and Economic Growth: a 2025 Update ikerketak, hala, adierazten du nabarmen handitu dela BPGaren gastu militarraren proportzioaren eta hazkunde ekonomikoaren arteko korrelazioa. 1970 eta 2023 bitartean, 0,77 puntuko igoera izan da korrelazio horretan mundu mailan, eta 0,66 puntukoa AEBetan, 1923 eta 2024 bitartean.

Lotura horren konplexutasunaz ohartarazten bada ere, ondorioak iradokitzen du gerra-inbertsioaren gorakadak hazkunde-metrika jakin batzuk bultza ditzakeela, eta, aldi berean, agerian uzten du gobernuek interesa dutela gerra-industriarako baliabideen etengabeko fluxua mantentzeko. Izan ere, Measuring Arms: Introducing the Global Military Spending Dataset izeneko azterketak baieztatzen du soberakin ekonomikoaren eta gastu militarraren arteko korrelazioak inoiz baino handiagoak izan direla azken bi mendeetan, potentzia jakin batzuen aberastasun-bolumen handiak armamentuaren ekoizpenera estrategikoki bideratzen direlako ideia indartuz. Egia da, dena den, ikerketa horrek datuak eskuratzeko dauden muga handiak ere aipatzen dituela. COW-ren Gaitasun Militar Nazionalei (NMC) buruzko datuen barruan, erregistro historikoen ia %20k ez dute gastu militarrari buruzko informaziorik.

Hala ere, badirudi irabazizko izaera hori herrialde batzuentzat soilik dela onuragarria. The Impact of Military Expenditures on Economic Growth: A New Instrumental Variables Approach ikerketak 1960 eta 2012 arteko 133 herrialdetako datuak jasotzen ditu, eta ondorio bat ateratzen du mahaira: gastu militarraren (BPGaren gainean) hazkundeak "garatzeko bidean" dauden herrialdeetako hazkunde ekonomikoa murrizten du. Kasu horietan, batez beste, gastu militarra 3,86 puntu igotzeak 4,40 puntu murriztu dezake aipatutako hazkundea. Azterlanak azpimarratzen duenez, behartsuenei mesede egin beharrean, ematen du gastu militarrak askotan ekartzen duela hezkuntzan, osasunean eta azpiegituran funtsezko inbertsioak baztertzea.

Bereziki argigarria da gastu militarraren eta hazkunde ekonomikoaren arteko korrelazio positiboa, Global Military Spending Dataset (GMSD) datu multzoaren arabera, munduko gastu militarra hirukoiztu egin baita Gerra Hotzaren puntu gorenarekiko. Horri dagokionez, berriz ere seinalatzen da interdependentzia ekonomikoa eta militarra (batez ere potentzia handietan, munduko BPGaren %75 biltzen baitute) espiral azeleratu gisa agertzen dela: soberakina zenbat eta handiagoa izan, orduan eta baliabide gehiago bideratzen dituzte armategietara.

Zifra horiek agerian uzten dute, egonkortasunaren erretorikaren atzean, gerraren negozio handia dagoela, ekonomia handienek bultzatuta; beren nagusitasunari eusteko eta handitzeko modu bat aurkitzen baitute gatazka belikoetan ere. "Segurtasun" kontu soil bat izan beharrean, armamentismoaren aldeko apustuak abagune kritikoak baliatzen ditu (ekonomikoak edo geopolitikoak) industria militarren irabaziak ziurtatzeko, askotan garapena eta bakea sakrifikatzearen kontura, munduko biztanleriaren sektore zabalentzat.