Aurreko asteartean zendu zen langile bat Konecta BTOko bere lanpostuan. Lankidearen gorpua ondoan zutela, beharginak lanean jarraitzera behartu zituen enpresak.
ARGAZKIA / La Voz del Sur
Hainbat sindikatuk jakinarazi dute, aurreko astean, eraso larri bat izan zela Madrilgo Konecta BTO telemarketin enpresan. Asteartean, langile bat hil zen bere lanpostuan, San Romualdoko lan-zentroan lanean ari zela. Alboan zituen bere lankideak.
Andre behargina zendu ostean, eta telematikoki lan egiteko aukera daukaten arren, euren lanpostuetan jarraitzera behartu zituzten gainerako teleoperadoreak, hildako lankidearen gorpua ondoan zutela. Bi orduz aritu ziren baldintza horietan telefono-deiak hartzen eta lanean.
"Enpresak erabaki zuen zerbitzuarekin jarraitzea lehenestea, Inmaculadak [hildako langilea] merezi zuen errespetua baino", adierazi du USO sindikatuak. Enpresak gainontzeko langileekiko "sentsibilitatea" erabat baztertu zuela ere salatu du.
