Erresuma Batua eta Alemania buru dituztela, Europako hainbat herrialde ari dira NATOk Groenlandian duen presentzia militarra handitzeko elkarrizketetan; "AEBei erakusteko, eta bereziki Donald Trump presidenteari, Europak Artikoaren segurtasuna serio hartzen duela", Bloomberg News-ek aipatutako iturrien arabera.

Hainbat informaziok eman dute ulertzera Alemaniak formalki proposatuko duela "eskualdea babesteko misio aliatu bateratu" bat sortzea. Trumpek "AEBek Groenlandiaren kontrola eskuratu" behar dutela esan ostean sortu da eztabaida, presidenteak argudiatu baitu "potentzia etsaiak lurralde horretan sar ez daitezen" bilatzen duela. Baieztapen horrek alarma piztu du Kopenhagen eta Bruselan, baina garrantzia kendu diote nolabait.

Heidi Alexander Erresuma Batuko Garraio idazkariak baieztatu zuen Londresek parte hartzen duela aipatutako elkarrizketetan, baina dramatismoa kentzen saiatu zen. "Bilera horiek NATOren esparruan dugun lankidetza-errutinaren parte dira", ziurtatu zion BBC-ri. Hala ere, onartu egin zuen Erresuma Batuak bat egiten duela "kezka estatubatuarrarekin", ustez, "Errusiak eta Txinak Zirkulu Artikoan egindako aurrerapena" dela-eta. Moskuren aurka "disuasio sinesgarria" mantentzeko beharra azpimarratu zuen, gainera.

Era berean, Peter Mandelsonek, Estatu Batuetako enbaxadore britainiar ohiak (iaz Jeffrey Epsteinekin zuen adiskidetasunagatik kaleratu zuten) BBC-ri eskainitako elkarrizketa batean azaldu zuenez, "denok esnatu beharko dugu"; ikusteko, bere hitzetan, "Artikoa Txinaren eta Errusiaren aurka babestu behar dela". Eta gaineratu zuen: "Galdetzen badidazu ea nork gidatuko duen segurtatze-ahalegin hori, denok dakigu, ezta? Estatu Batuak izango dira".

Danimarka bidegurutzean

Mette Frederiksen Danimarkako lehen ministroak esan du egoera "une erabakigarria" dela bere herrialdearentzat, estatubatuarren presioen aurrean. "Jokoan dagoena begien bistatik haratago doa", adierazi zuen parlamentuko eztabaida batean. Danimarka "NATOren barruan aliatu sendoa" dela aldarrikatu zuen, bere gobernuak Danimarkaren eta Groenlandiaren "subiranotasunaren, autodeterminazioaren eta lurralde-osotasunaren printzipioak" defendatuko dituela ohartaraziz.

Groenlandiako Parlamentuak larrialdiko saio bat hitzartu zuen, Washingtonek uhartearen jabetze posible bati buruz egindako iradokizunen aurrean, erantzun politiko bateratu bat zehazteko. Alderdi nagusietako buruzagiek komunikatu bat igorri zuten, "Estatu Batuek gure herrialdearekiko duten mespretxua" bertan behera uzteko eskatuz.

Alemaniako "epailea"

Aldi berean, Johann Wadephul Alemaniako Atzerri ministroak bisita ofizial bati ekin zion Washingtonen, "elkarrizketa transatlantikoa berrosatzeko" asmoz, ustez. Groenlandiako tentsioek eta Venezuelaren aurkako erasoak markatzen dute testuingurua, besteak beste. Reykjaviketik, Islandiako homologoarekin bildu ostean, Wadephulek nabarmendu zuen "Trumpek Artikoan mehatxuak hautematen baditu, erantzun bateratuak bila" daitezkeela.