Ostegunean, lan egiten zuen enpresako aldagelan ondoezik sentitu zen behargina, eta handik gutxira galdu zuen bizia ospitalean. Aurten, hiru lan-heriotza izan dira jada Euskal Herrian.
Joan den ostegunean, Zestoako (Gipuzkoa) Artzubia Industriak enpresan aritzen zen langile bat hil zen. Lan-istripu "ez traumatiko" bat izan zen: behargina ondoezik sentitu zen enpresako aldagelan, eta ospitalera eraman zuten. Handik gutxira zendu zen erietxean; 51 urte zituen.
Bestalde, ostegunean bertan, Ibarrako (Gipuzkoa) Voith enpresara zihoan garraiolari bat larri zauriturik aurkitu zuten gidatzen ari zen ibilgailuan. Dirudienez, bihotzeko bat izan zuen, eta larri eraman zuten ospitalera. LAB sindikatuak salatu duenez, "garraiolarien sektorea da alde handiz arazo kardiobaskularrak neurri handienean pairatzen dituen langile kolektiboa".
Gogorarazi dute, bestalde, aurreko astean beste behargin bat hil zela Izarrako (Araba) bulego batean, lan-istripu ez traumatiko batean. Iaz, gutxienez 69 lan-heriotza izan ziren Euskal Herrian, eta heriotzen %33 izan ziren "ez traumatikoak"; 23.
Iturri sindikalen arabera, 2023. urtea hasi zenetik, gutxienez hiru langilek galdu dute bizia Euskal Herrian soldatapean lanean ari zirela.
