Elkarretaratze bat antolatu du abenduaren 30erako: Sarasate pasealekuan izango da, 19:00etan.
Iruñerriko Kontseilu Sozialistaren mobilizazio bat, 2022ko abenduan.
Amaitzen ari da urtea, eta Iruñerriko (Nafarroa) Laneko Autodefentsa Sareak salatu duenez, gutxienez hemeretzi lan-heriotza izan dira aurten Nafarroan. Iturri sindikalen arabera, Hego Euskal Herrian, 64 dira soldatapean lanean ari zirela bizia galdu duten langileak. Hala, lan-heriotzen kontra eta erailketa horien erantzuleak seinalatzeko, kontzentrazio bat egingo du LASek hurrengo astelehenean. 19:00etan hasiko da protesta Sarasate pasealekuan, diputazio aurrean.
Iruñerriko LASek aurreko astean argitaratu zuen ohar bat, lan-heriotzak hizpidetzat hartuta. "Heriotza horiek ez dira gertatzen istripu 'zorigaiztoko' edo 'giza-akats' soilengatik. Heriotza horiek erantzuleak dituzte", seinalatu zuen: "Gobernuak, patronalak eta sindikatu nagusiek bat egiten dute irabazi kapitalista gure kontura bermatzeko". Hain justu, "etekin kapitalisten kontra eta gure ongizatearen alde" gaitzetsi zituen soldatapeko laneko istripuak eta heriotzak, ohartarazita sistema kapitalista dela "lan-prekaritatearen oinarria".
