Gasteizen, gaurko dago ezarrita Sansomendin bizi den familia baten etxegabetzea, bizitoki-alternatibarik gabe. Desalojoaren aurka protesta egiteko, Etxebizitza Sindikatu Sozialistak kanpaldi bat hasi zuen atzo arratsaldean, familia bizi den tokian: kanpin-dendak jarri zituzten eta bertan egin du gaua jende ugarik, etxe-kaleratzeei ezetz esanez.
19:00etan ekin zieten hainbat ekimeni kanpaldian: txokolate beroa banatu zuten eta zenbait musika-emanaldi izan ziren, hala nola, Kullen eta Kilikiren kontzertua eta jam session bat.
Gaur goizean, asanblada bat egin dute bertan, goizerako finkatuta dagoen etxe-kaleratzeari aurre egiteko prest baitago sindikatua. Azken egunetan, desalojoa salatzeko ekimen ugari izan dira Gasteizen: aurreko astean, elkartasun-argazki bat atera zuten sindikatuko hainbat kidek, auzoko eskola-komunitateek eta bizilagunek; eta agerraldi bat egin zuen Miguel de Unamuno ikastetxeko hezkuntza-komunitateak, bertan ikasten baitute kalean gelditzear dagoen familiako hiru kidek. Sei adingabe ditu familiak.
