Kaleratze kolektibo baten mamua daukate gainean Bridgestone enpresako langileek Basaurin (Bizkaia), Usansolon (Bizkaia) eta Puente San Miguelen (Kantabria). Izatez, gaur da plantillari ezarritako aldi baterako enplegu-erregulazioko espedientearen azken eguna, eta oraindik ez dute argitu zer etorriko den gaurko egunaren ondoren. Automobilgintzako lantokietako beharginek duela bi aste ekin zieten protestei, enpresako zuzendaritzari exijitzeko industria-plan bat antolatu zezala aldi baterako lan-erregulazioaren osterako. Oraingoz, baina, ziurgabea da datorrena.

Bridgestonen inor ez dago soberan, soluzioak falta dira lelopean egin dituzte mobilizazioak Basaurin eta Puente San Miguelen, eta bat egin dute ELA, CCOO, UGT, BUB eta SITB sindikatuek. Enpresak informazioa ezkutatzen duela salatu dute, izan ere, zuzendaritzak denbora darama hemendik aurrera hartuko dituen neurriak zein izango diren argitu gabe. "Bridgestonek iragarri du berregituraketak egingo dituela Europan, azalpenik eta alternatibarik gabe", esan zuen Basauriko langile-batzordeak hilaren 17an.

Lan-erregulazioa ezartzeko, enpresa-zuzendaritzak azken bi urteetako salmenten beherakadari egin izan dio erreferentzia, eta aurreikuspen ezkorrak egin ditu: 2026rako, 2024an baino %25 pneumatiko gutxiago saltzea espero du Basaurin. Etenaldiekin izan den arren, Bridgestoneko langileek, guztira, 120 egun daramatzate aldi baterako lan-erregulazioan. Izan ere, 2023aren amaieran sartu zen indarrean espediente bat aipatutako fabriketan, eta 2024an luzatu ostean, beste espediente bat aplikatu zuten gero; gaur agortuko dena hain zuzen ere.

Gaur egun, 900 bat langile dira Basauriko lantegian eta 45 inguru Usansolon. 2012an ere izan zen kaleratze kolektibo bat multinazionalak Espainiako Estatuan dituen fabriketan, 442 pertsona kanporatu baitzituzten. Horietatik 216 kaleratu zituzten Basaurin eta Usansolon.