Ibercajak gaur bota nahi zuen pertsona bat bere etxetik, eta kaleratzeari aurre egitera deitu zuen sindikatuak. Egiten ari diren borrokari esker, etxegabetzea atzeratzea lortu dute oraingoz. Ohartarazi dutenez, "sindikatuak esku hartu izan ez balu", gaur izango litzateke kaleratzea, "teorian, etxegabetzeen moratoria indarrean egon arren".
Etxegabetua izateko arriskuan dago emakume bat Iruñeko (Nafarroa) Artikaberri auzoan. 2005etik bizi da bertan, "zabor-hipoteka" deiturikoen goraldi betean hipoteka bat hartu eta etxe bat erosi baitzuen. Orain, etxe horretatik bota nahi du Ibercaja banketxeak, eta gaurko zegoen ezarrita horretarako data.
Etxe-kaleratzeari aurre egitera deitu zuen Iruñerriko Etxebizitza Sindikatu Sozialistak: 08:30ean Maiatzeko Plazako Amak kaleko 3. zenbakira bertaratzeko deia zabaldu zuen. Hala, hainbat pertsona bildu dira bertan goizetik, etxegabetzeari kontra egiteko asmoz. Orain arte egindako borrokari esker, baina, ematen du momentuz kaleratzea atzeratzea lortu duela sindikatuak.
Kaleratzea atzeratuta, baina noiz arte jakin gabe
Segizio judiziala ez da gaurkoan Artikaberrira joan. Etxegabetzea eteteko asmoz, auzitegian hainbat dokumentazio eta ziurtagiri aurkezten ari da kaleratua izatear dagoen bizilaguna, eta badirudi horretarako epea luzatzea lortu dutela. Sindikatuaren esanetan, epaitegitik oraindik ez diete jakinarazi noiz arte atzeratu duten kaleratzea.
"Salatu nahi dugu, azken momentura arte, etxegabetu nahi duten emakumea ezinegonean mantendu dutela, zer gertatuko zen jakin gabe", esan dute sindikatuko kideek. Azpimarratu dute, gainera, antolatu eta esku hartu ez balute, gaur bertan gauzatuko litzatekeela Artikaberriko etxegabetzea; "teorian, etxegabetzeen moratoria indarrean egon arren".
Etxebizitza Sindikatu Sozialistak, "instituzioen promesa faltsuetatik haratago, antolakuntza independentea indartzeko apustua" berretsi du gaur; "etxegabetzeen eta etxebizitzaren negozioaren kontra". Borrokak merezi duela aldarrikatu du berriz, eta hurrengo berriei adi egotera deitu du.
Etxegabetze bat baino gehiago egun bakoitzeko
Hiru aste baino gutxiago dira Euskal Herriko Etxebizitza Sindikatu Sozialistak harrera- eta aholkularitza-baliabideak berriz ireki zituenetik, eta etxe-kaleratzeei lotutako 36 kasuren berri izan du jadanik. "Etxegabetze
horietako asko iristeke daude, eta beste batzuk geldiarazten saiatzen
ari gara, hainbat lege-baliabideren eta presio sozialaren bidez. Hala
ere, datuak argi eta garbi erakusten du gure lurraldean gora egin duela
etxebizitzaren arazoak", esan du sindikatuak.
🔵 #EtxebizitzaSindikatua
— Kontseilu Sozialista Iruñerria (@Kontseilua_Iru) October 4, 2024
GAURKO ETXEGABETZEA BERTAN BEHERA! pic.twitter.com/hbjUMDw3Zc
