More in Common erakundeak berriki egindako inkesta baten arabera, Espainiako Estatuko biztanleen %57k diote murrizketak onartuko lituzketela zerbitzu publikoetan, defentsa-aurrekontua handitzeko. Europa Press agentziak eta beste hainbat hedabidek zabaldutako ikerketaren arabera, %64 daude Ukrainara "bake-tropak" bidaltzearen alde, eta %25ek soilik uste dute Estatu Batuak Espainiako Estatuaren aliatu direla.

Hala ere, datu horien fidagarritasuna zalantzan jarri dute hainbat iturrik, informazio horiek sustatzen dituen erakundearen izaeragatik eta metodologiari buruzko informazio zehatzik ez izateagatik. More in Common Frantziako Estatuan, AEBetan, Erresuma Batuan eta Alemanian egoitza duen erakunde bat da. Bere web-orrian, "narratiba" espezifikoak "sustatzeaz" arduratzen dela dio. Gainera, haren finantzaketa Open Society Foundations delakotik dator. Nazioarteko politiketan eragin handia duen erakunde bat da hura, eta armagintzarekin duen lotura asko dokumentatu izan da.

Galdeketa 2025eko martxoaren 16tik 23ra bitartean 2.000 pertsonari egin bazaie ere, ez dute argitaratu laginari buruzko xehetasun osorik, ezta galderak egiteko moduari buruzko xehetasunik ere, eta horrek eragotzi egiten du emaitzak modu independentean egiaztatzea.

Pedro Sanchez buru duen Espainiako Gobernuak hitzeman du "defentsan inbertsioa handitzeko" ez duela "gastu sozialean zentimo bat ere murriztuko". Hala ere, aipatutako azterketa argitaratu duten unea eta galdeketaren ikuspegia ikusita, aditu batzuek zalantzan jarri dute iritzi publikoaren neurketa erreal bat ote den, edo Espainiako Estatuko gastu militarrari buruzko eztabaida politikoan eragiteko saiakera bat. Izan ere, duela gutxiko beste inkesta batzuek kontrakoa iradokitzen dute: Sigma Dosen inkesta baten esanetan, Espainiako Estatuko boto-emaileen %72,8k uko egiten diote gastu militarra handitzeari, zergak igotzea baldin badakar.