Maiatzaren 17an eta 18an baraua egingo dute, gainera, preso horietatik hamarrek. Iruñean izango da Palestinarekin Elkartasuna plataformak larunbaterako antolatu duen manifestazioa, 12:30ean Antoniuttitik hasita.
ARGAZKIA / Europa Press
Larunbat honetan, hilaren 18an, manifestazio nazional bat izango da Iruñean (Nafarroa): Palestinaren askatasuna aldarrikatuko dute eta Israel "borrokatzera, desnormalizatzera eta suntsitzera" deituko dute. Antoniuttitik abiatuko da Palestinarekin Elkartasuna plataformak antolatutako mobilizazioa, 12:30ean.
Urtarrilean gertatu bezala, oraingoan ere, Euskal Herriko hainbat preso politikok egin dute bat mobilizazio deialdiarekin. Hain zuzen ere, hamazazpi kide batu dira deialdira: Aitor Cotano Sinde, Beñat Aginagalde Ugartemendia, Dani Pastor Alonso, Dolores Lopez Resina, Fernando Elejalde Tapia, Fernando Garcia Jodra, Garikoitz Etxeberria Goikoetxea, Iñaki Krutxaga Elezkano, Irantzu Gallastegi Sodupe, Jesus Mari Etxeberria Garaikoetxea, Jon Kepa Preciado Izarra, Julen Atxurra Egurrola, Leixuri Gallastegi Sodupe, Mikel San Sebastian Gaztelumendi, Orkatz Gallastegi Sodupe, Patxi Ruiz Romero eta Xabier Garcia Gaztelu.
Deialdira atxikitzeaz gain, preso horietatik hamarrek baraua egingo dute bi egunez; hain zuzen ere, ostiralean eta larunbatean.
