Donostian (Gipuzkoa) egin dute agerraldi bat Euskal Herriko hainbat gazte-kolektibotako kideek, apirilaren 5ean etxebizitza-eskubide unibertsalaren alde mobilizatzera deitzeko. Izan ere, Euskal Herriko Etxebizitza Sindikatu Sozialistak manifestazio bat prestatu du larunbat honetarako, Donostian bertan, eta deialdiarekin bat egin dute aipatutako gazte-eragileek: gazteriak emantzipatzeko duen ezintasuna salatu eta apirilaren 5ean kaleak hartzeko deia egin dute.

Nabarmendu dute larriagotzen ari dela etxebizitzaren arazoa eta egoera "jasanezina" dela langile-klaseko gazteen artean: "Emantzipatzeko adina 30 urtetik gorakoa da, alokairuen prezioak ordainezinak dira eta dirulaguntzarik gabe ezin gara emantzipatu; eta, gainera, alokairuen prezio itogarriek eraginda, gure herrietatik eta auzoetatik kanporatzen gaituzte". Horregatik jo dute ezinbestekotzat "gazteon artean emantzipatzeko ezintasunaren aurka eta etxebizitza-eskubidearen alde mobilizatzea eta borrokatzea, larunbatean Donostian egingo duten modura.

Etxebizitzaren negoziotik aberasten direnak eta politikariak, elkarren eskutik

Gazteek salatu dute asko direla etxebizitzaren negozioari esker irabaziak lortzen dituztenak, hala nola "tamaina guztietako etxejabeak, espekulatzaileak, putre-funtsak, kolpeka etxegabetzen gaituzten desokupa enpresak, eraikuntza-enpresak, bankariak" eta abar. Baina, horiez guztiez gain, salatu dute politikari profesionalak ere "arazoaren parte" direla, etxebizitzaren arazoari "aterabide errealak eman" beharrean, etxebizitzaren negozioa indartzen dutelako: "jabeen intereserako" neurriak hartzen dituzte, "diru publikoa eraikuntza-enpresa pribatuetara bideratzen dute" eta ez diote "muga errealik" jartzen alokairuen prezioari, besteren artean.

"Politikari profesionalak hartzen ari diren neurriek higiezinen negozioa finantzatzeko baino ez dute balio, eta, kasurik onenean, gazte langileon pobretze-prozesua apur bat mantsotzeko", seinalatu dutenez. Horren adibide modura aipatu dituzte Emantzipa edo Gaztelagun programak, "diru publikoaren zati handi bat errentatzaileen poltsikoetara bideratzen" dutelako horien bidez. Eta hori gutxi balitz, "langile-klaseko zati bat laguntza horien menpe dagoen bitartean", asko aukera horretatik kanpo geratzen direla ere ohartarazi dute, "filtro burokratiko" guztien ondorioz. 

Ahots propioz

Aldi berean, "prezioek gora egiten jarraitzen dute, etxebizitza eskuratzeko aukera gero eta murritzagoa da eta langile-klaseko gazteon zailtasunak areagotzen ari dira", agerraldian bildu diren gazte-kolektiboetako kideen esanetan. Horregatik azpimarratu dute, zeregin politikoen artean, funtsezkoa dela emantzipatzeko ezintasunaren aurka borrokatzea eta kaleak hartzea, "etxebizitzaren negozioaren atzaparretatik askatzeko".

Egiatan, iritzi diote egoera ez dela "enpresarien interesetara dauden politikarien eskutik aldatuko". Aldarrikatu dutenez, "gure aldarrikapenak ahots propioz atera behar ditugu kalera, etxebizitzarako sarbidea etekin-iturri den bitartean, gazteon emantzipatzeko ezintasunak bere horretan jarraituko baitu". Larunbateko manifestazioa 12:00etan izango da, Donostiako Bulebarretik abiatuta, Euskal Herriko Etxebizitza Sindikatu Sozialistak antolatuta.