Espetxeko mediku taldeak atzo adierazi zion bilbotarrari gaur emango dutela bukatutzat hari ezarritako konfinamendua. Asteazkenean hasi zuen gose greba, eta atzora arte izan da baraualdian.
Zuerako kartzelan (Zaragoza) daukate atxilo Dani Pastor preso politikoa. Joan den asteazkenean, 00:00etan, gose grebari ekin zion; COVID-19a atzemateko proban positibo eman ostean jasandako tratu txarrak, irainak eta mehatxuak salatzea zuen asmo. Azaroaren 15etik izan dute bakartuta, eta bere jabetza pertsonalik gabe.
Bilbotarrak atzo jakinarazi zuenez, asteazkenean bertan bildu zen espetxeko Segurtasun Zuzendariordearekin, 10:00etan. "Nik azaldutako gertaera guztiak ikertzeko konpromisoa adierazi zidan", azaldu du Pastorrek.
Mediku talde batek atzo esan zion gaur, ostiralean, amaitutzat emango dutela presoari ezarritako konfinamendua. Hortaz, "halabeharrez burura eraman behar" izan duen gose greba ere bertan behera utzi zuen atzo bertan, 15:30ean. "Zuen maitasun eta babes solidario guztiagatik eskerrak emanez agurtzen zaituztet", adierazi zuen atzo.
