Gasteizko Txosnetako beto politikoa salatu dute herri-mugimenduko 110 lagunek

AKTUALITATEA / Jazarpen politikoa

"Ezohiko egoera politiko honi behin betiko irtenbidea ematea beharrezkoa dela uste dugu. Parte hartzeko eskubidea ukatzen jarraitzeak ez du herri-mugimenduaren garapenean laguntzen", adierazi dute sinatzaileek, Txosna Batzordeak GKSri eta Etxebizitza Sindikatu Sozialistari jarritako betoa gaitzetsiz.

2026eko uztailaren 21 - 08:54

Gasteizko Txosnetako beto politikoa salatu dute herri-mugimenduko 110 lagunek

GEDAR

2026eko uztailaren 21 - 08:54

Ekainaren hasieran, Gazte Koordinadora Sozialistak (GKS) eta Etxebizitza Sindikatu Sozialistak Gasteizko txosnagunean jasaten duten debekua salatu zuten herri-mugimenduko zenbait kidek, gutun baten bidez. Ordutik, beste hainbat eta hainbat pertsonak babestu dute idatzia, eta jada 110 dira Mugimendu Sozialistaren aurkako beto politikoa gaitzetsi duten sinatzaileak.

Hona hemen gutuna osorik, eta hura sinatu duten herri-mugimenduko lagunen zerrenda:

"Gasteizko panorama politikoan bizitzen ari garen ezohiko egoera salatzen daramatzagu azken urteak. Alegia, Txosna Batzordeak GKS eta Etxebizitza Sindikatuari txosnetan parte hartzeko eskubidea ukatzea.

Hemen batu garen kideok modu ugaritan hartu izan dugu parte Txosnetan: sorreratik proiektuan parte hartuz, montajeen parte izanez, hainbat eta hainbat turno eginez, jarduera ezberdinak antolatuz bertan… Betiere espazio ireki eta pluralak izan direlarik, Gasteizko mugimendu sozial eta herrikoiek euren eguneroko lana jai giroan eta aldarrikapenez hedatu ahal izateko.

Txosnak Gasteizko herri mugimenduaren borrokaren fruitu izan ziren. 40 urte hauetan etapa ezberdinetatik pasatu dira, baina beti mantendu izan dute euren izaera herrikoi, ireki eta parte hartzailea; alegia, herri mugimenduko sentsibilitate politiko guztiek eduki izan dute bertan parte hartzeko aukera. Ezberdintasun politikoen gainetik, beti egon izan da adostutako elkarlanerako oinarri bat, txosnak espazio irekiak, autogestionatuak eta jai ofizialekiko alternatiboak izan ahal izateko.

Gasteizko herri mugimendua, ezberdintasun ideologikoetatik haratago, askotan izan da elkarlanean jarduteko hainbat adostasun bilatzeko gai, izan espazio txosnero honetan zein bestelako eremu batzuetan ere. Ezohiko egoera politiko honi behin betiko irtenbidea ematea beharrezkoa dela uste dugu. Kolektibo hauek bertan parte hartu behar dutela iruditzen zaigu, Txosna Batzordea osatzen duten talde ezberdinek dauzkaten baldintza berdinetan.

Parte hartzeko eskubidea ukatzen jarraitzeak ez du herri mugimenduaren garapenean laguntzen, duen zentzurik zabalenean: konfiantzak garatzeko, elkarrekiko errespetua onartzeko, eta elkarlanerako bideak sortzeko, gure aldarrikapenen oihartzuna entzun dadin.

Ezin ditugu gasteiztarrak txosna giroan parte hartzera gonbidatu eta aldi berean herri mugimenduan errotuta dauden kolektiboei parte hartzeko eskubidea ukatu. Ez ditugu halako zentsurak onartzen, ez honetan eta ez beste espaziotan ere. Gure apustua txosnagunean beti izango da kooperazio ireki, plural, horizontal eta autogestionatuaren aldekoa.

Honengatik guztiagatik, gaurdanik, beharrezkoak diren esfortzu guztiak egiteko eskatzen diegu Txosna Batzordeko kolektibo guztiei, diskrepantzia ideologikoen gainetik halako espazio bat partekatu ahal izateko. Oinarri adostu baten baitan, bere jarraikortasuna bermatuko duena, irekia izango dena eta elkarlanerako espazio alternatibo eta autogestionatua izango dena.

Gutun hau izenpetzen dugunok konponbide baten aldeko kontsentsua sustatzen jarraituko dugu, GKS eta Etxebizitza Sindikatuaren parte hartzea bermatuko duena, 2023an egin bezala, herri mugimenduko berrogeita hamar kidetik goraren babesa jaso genuenean. Horregatik, gaurtik eta Gasteizko jaietara arte egoera hau sozializatzen eta babesak jasotzen jarraituko dugu blokeo egoera hau gainditzera bidean".

Gutunaren sinatzaileak:

Itziar Abad

Idoia Agirre

Javi Aguillo

Klara Alfonso

Albaro Anta

Iñigo Antepara

Fernando Txiki Antia

Andoitz Aperribai

Lierni Arakama Moreno

Javier Argote

Liher Armendariz