Aktualitatea
/
ETXEBIZITZA
Europako Banku Zentralak %0,75 igo ditzake interes-tasak ostegun honetan
Hipotekak are gehiago garestituko dira EBZk euriborraren 75 puntuko igoera berri bat iragartzen badu. Bien bitartean, atzeraldia Europako potentzien gainean da.
2022/10/25
19:03
Euroguneko ekonomiak Europako Banku Zentralaren (EBZ) osteguneko iragarpenaren zain daude, moneta erakundeak interes-tasak oinarrizko 75 puntu gehiago igotzea aurreikusten baita datorren ostegunean. Urriaren 26koa EBZk inflazioa erregulatzeko interes-tasak igotzen dituen hirugarren aldia litzateke aurten. Bloomberg atariko ekonomialariek iragarri dutenez, "interes-tasak igotzen jarraituko dute ekonomiak uzkurtu ahala".
Interes-tasen igoerak ehunka mila zorduni eragingo die, hipotekak nabarmen handituko baitira horren ondorioz. EBZren interes-tasek % 3 inguruko maximoa lortzea espero da, baina badira datorren urtearen erdialderako % 3,25eko maximoak aurreikusten dituztenak. Dena den, testuinguru ezegonkorra ikusita, zaila da zifrekin aurreikuspen zehatzak egitea. EBZko arduradun politikoak aste honetan hartutako erabakian zentratzen diren bitartean, eurogune osoko hazkunde ekonomikoari buruzko datuak ere esanguratsuak izango dira.
Zifra horiek ikusi eta berehala, ostiralean argitaratuko dira euroguneko hiru ekonomia nagusien hirugarren hiruhilekoko Barne Produktu Gordinaren datuak. Litekeena da Alemaniakoak uzkurdura izatea, eta Frantziako zein Espainiako Estatukoak, ziurrenik, nabarmen atzeratuko dira. Errepublika Federalak hazkunde negatibo jarraiarekin igaroko lukeen hirugarren hiruhilekoa izaki, atzeraldi egoeran legoke.
EZ DAGO IRUZKINIK
