Adingabea da abortua izan duen emakumea, eta ospitalera eraman behar izan zuten aurreko larunbatean. Atxilotu egin zuten bere mutil laguna; 21 urte ditu.
Gasteizko (Araba) Salburua auzoko etxebizitza batean izan ziren gertakariak pasa den larunbatean. Hainbat hedabidek jakinarazi dutenez, emakume bat abortatzera behartu zuen bere bikotekideak; adingabea da emakumea, eta ospitalera eraman behar izan zuten.
Larunbat gauean, Ertzaintzari abisu bat eman zioten, haurdun zegoen emakume gazte batek umea galdu berri zuela-eta. Etxebizitzara bertaratu zen poliziak, eta abisua egiaztatu zutenean, ospitalera eraman zuten emakumea; bertan artatu zuten osasun-zerbitzuetako langileek. Lau hilabete zihoan haurdun.
21 urte ditu bere mutil lagunak, eta hura ere etxebizitzan zegoen une horretan. Atxilo eraman zuten; bikotekidea abortatzera behartzeagatik, emakumeen kontrako indarkeria delitu bat leporatu diote.
