Alarma egoeran hezkuntzan ezarri den 'online' metodologiak "aldaketa handiak" eragin ditu "ikasteko moduan eta baldintzetan", Ondarroa BHIko ikasleek azaldu dutenez. Ebaluazio-sistema, ordea, ez dela aldatu salatu dute: "Ez dugu uste azterketa denik gure lana ebaluatzeko modu bakarra edo onena. Oraindik gutxiago, gauden egoera ez-ohikoan egonda". Hala, sei eskaera zehatz egin dizkiete ikastetxeko zuzendaritzari eta irakasleei, eta sinadura-bilketari ekingo diotela iragarri dute.
Ondarroako (Bizkaia) Ondarroa BHI ikastetxeko hainbat ikaslek ebaluazio-sistema "justuago bat" eskatzeko kanpaina jarri dute martxan. Argitaratutako adierazpenean azaldu dutenez, Covid-19ak sortu duen egoerak erabat aldatu du eskolak emateko era, eta online bidezko klaseek "aldaketa handiak" eragin dituzte "ikasteko moduan eta baldintzetan". Hala, ikasketa prozesua behar bezala jarraitzea "zaila" dela salatu due, baita "lan-karga handia" dutela ere.
"Baina, hala ere, bada gauza bat berdin jarraitzen duena ikasleontzat: ebaluazio-sistema", diote. Hortaz, ebaluazio-sistema ere ez-ohiko testuingurura moldatzea eskatu diote institutuko zuzendaritzari eta irakaslegoari: "Ez dugu uste azterketa denik gure lana ebaluatzeko modu bakarra edo onena. Oraindik gutxiago, gauden egoera ez-ohikoan egonda. Penagarria da etxean itxita gauden honetan ere azterketa batzuen menpe egotea gure etorkizuna".
Hain zuzen, ondorengoak dira lehenengo batxilergoko eta DBHko 4. mailako ikasleek egin dituzten eskaerak:
- Hurrengo ikasturterako beharrezkoak dituzten edukiak bakarrik ematea.
- Galtzen ari diren hilabeteak hurrengo urtean berreskuratu behar ez izatea.
- Ebaluatzerako orduan, hirugarren ebaluaketan, ikasle guztiei gaindipen orokorra ezartzea. Nota, lehenengo eta bigarren ebaluaketekin eta ebaluaketa honetako lanekin ateratzea; hau da, konfinamenduan azterketak bertan behera geratzea, eta horren ordez, lanak eta aurreko ebaluaketak kontuan hartzea.
- Ebaluaketan, nota igotzeko egon diren borondatezko aukerak ez kentzea. Gainera, nota igo ahal izateko erraztasunak eskaintzea, ikasleontzat interesgarriak eta errazak izango diren borondatezko lanen bidez.
- Irakasgaiak berreskuratzeko orduan erraztasunak jartzea eta metodo erraz eta argiagoekin egitea; adibidez, lanekin.
- Galdutako edukia jaso nahi duten ikasleei (interesatzen zaielako, etorkizunerako behar dutelako...) aukera eta erraztasun guztiak ematea, beti ere derrigortasunik gabe.
Kanpaina osatzeko, sinadura-bilketa bat eta bideo-kanpaina bat abiatuko dituzte, eta ikasleei, gurasoei nahiz Ondarroako bizilagunei egingo diete dei parte hartzera. Ikasleek, gainera, haien ikas-baldintzen "defentsa zilegia eta irmoa" egiten jarraituko dutela adierazi dute.
