Larunbat arratsaldean, Burlatako (Iruñerria, Nafarroa) kaleak hartu zituzten bertako Gaztetxearen alde. Udaletxe aurretik atera zen Burlatako Gazte Asanbladak deitutako mobilizazioa, eta albiste pozgarri baten berri eman zuten gazteek: "Hilabetetako borroka-prozesuaren ostean udal-gobernuak gure azken proposamena onartu du. Gaztetxearen proiektuarekin aurrera egiteko eskatzen genituen oinarrizko bermeak onartu ditu. Burlatako Gaztetxeak bizirik jarraituko du". Asanbladaren hitzetan, horrek erakusten du "borrokak merezi" duela, eta eskerrak eman dizkie "modu batean edo bestean Gaztetxearen alde" lan egin duten guztiei.

Uholdeei aurre egiteko proiektu baten barruan eraitsiko dute laster Gaztetxea, eta obrak aurrera zihoazela jakinik ekin zion Gazte Asanbladak udal-gobernuarekin hitz egiteari, Gaztetxearen jardunarekin jarraitu ahal izateko alternatiba bat lortzeko asmoz. Udalak, ordea, ez zituen gazteek egindako eskaerak onartzen, eta martxoaren 15ean Gaztetxea husteko agindua eman zuen.

Desalojoaren aurka eta Gaztetxearen jardunarekin segitu ahal izateko aterabide baten alde, gogor egin du borroka asanbladak: horren erakusle da duela pare bat aste bi kide udaletxean kateatu izana, eta protesta-ekintza horren harira izandako elkartasun-olatua. EH Bilduk gobernatutako udalaren gaineko presioa areagotu du horrek guztiak, eta, azkenean, Gaztetxea ziurtatzeko baldintzak onartu behar izan ditu.

Zazpi urteko ibilbidea

"Burlatako Gaztetxea 2018an ireki genuen lehen aldiz. Gaur, zazpi urte beranduago, Gaztetxearen proiektuarekin aurrera jarraitzen dugu", esan zuten larunbatean asanbladakoek. Gogora ekarri zuten Gaztetxea ireki zutenetik bidea ez dela "erraza izan", eta hainbatetan egon dela arriskuan proiektua. Duela zazpi urte okupatutako espaziotik alde egin behar izan zuten lehenengo, nahiz eta, gogor borrokatu ostean, udalak gaur egungo eraikina (Soldadura Tailer-Eskola izandakoa) lagatzea lortu zuten. Iaz, baina, berriz aurkitu zen arriskuan Gaztetxea, Nogalera 2025 proiektuaren ondorioz.

Asanbladak gogorarazi du 2018tik hona "gazte-belaunaldi ezberdinak" batu direla Gaztetxean eta "hamaika proiektu" abiatu dituztela bertan; "Gaztetxeak hori direlako, antolakuntzarako espazioak, antolakuntzarako tresnak, borrokarako tresnak". Beraz, kezkaz begiratzen dio Euskal Herrian "Gaztetxeak desagertuz joan" izanari: "Despolitizazioa eta desmobilizazioa nagusi diren garai honetan gazte-sektore zabalak antolatzeko, borroka-dinamikak irekitzeko, formakuntza politikorako eta bestelako aisialdi-eredu bat indartzeko beharrezko espazioak dira". Eta gaineratu zuen, hala, beharrezkoa dela "Gaztetxe berriak lortzeko borrokak berraktibatzea eta bizirik dirauten Gaztetxeak defendatzea".

Arriskuan dauden espazioak

Beste behin ere, Burlatatik babes osoa eman zieten "Euskal Herrian desalojo arriskuan edo epaiketa-prozesuetan aurkitzen diren Gaztetxeei"; hala nola, Durangoko (Bizkaia) Kaletik Gaztetxera asanbladari, Bilboko (Bizkaia) Etxarri II Gaztetxeari, Igorreko (Bizkaia) Kiñu Gaztetxeari eta Zornotzako (Bizkaia) Matrailu Gaztetxeari. Aurreko ostiral arratsaldean, hain zuzen ere, Etxarriren aldeko manifestazio jendetsu bat izan zen Bilbon, ostiral honetarako baitago ezarrita espazioaren desalojoa.