Baionan 15 urteko neska bat bortxatu du haren 20 urteko nebak. Gasteizen, aldiz, bi emakume kolpatu dituzte euren bikotekideek; haietako bati aizkorarekin egin zion mehatxu gizonak. Pasa den asteburutik, gutxienez zazpi izan dira Euskal Herrian eman diren erasoak.
Genero indarkeriaren kontra Baionan egindako elkarretaratzea. Argazkia: Bob Edme
Azken egunetan ere ez dute etenik izan genero indarkeria kasuek Euskal Herrian. Baionan (Lapurdi) 20 urteko gizonezko bat espetxeratu dute, 15 urteko arreba bortxatzeagatik. Berria egunkariaren arabera, atxilotuak onartu egin du arreba bortxatu duela. Haur bat izan berri du neskak, eta ikastetxeak salatu zuen haren egoera; izan ere, susmoak piztu ziren neskaren gorpuzkeran aldaketak antzematen hasi zirenean, zein antsietatea izaten hasi zenean. Erasoa dela-eta, bortxaketa eta intzestua leporatu dizkiote espetxeratuari.
Bi eraso Gasteizen
Bestalde, atzo, hilak 9, bi gizon atxilotu zituzten Gasteizen (Araba) haien bikotekideak erasotzeagatik. Emakume biek ere kolpeak jasan zituzten; haietako bati gainera, aizkoraz mehatxu egin zion bikotekideak. Erietxean artatu behar izan dituzte bi emakumeak.
Azken hiru eraso horiekin, dagoeneko zazpi dira pasa den asteburuaz geroztik Euskal Herrian gertatu diren genero indarkeria kasuak, gutxienez. Bizkaian salatu zituzten erasoetako bi -Zallan eta Boluetan-, eta beste biak Gasteizen jazo ziren.
