"Ezkutuan" desalojatu nahi dituzte Errotxapeako gaztetxeko kideak

Ohartarazi dutenez, “ebazpen administratiboen aitzakipean maletak egitera behartu” eta 2016an berreskuratutako eraikinetik kanporatu nahi dituzte. Ekimenak antolatzen jarraituko dutela ziurtatu dute. “Ebazpenak ez du etengo gure garaipena”.
Argazki Nagusia
Hainbat gazte RTX gaztetxeko teilatuan okupazio egunean
2019ko maiatzaren 13a

“Ekimenak gauzatzea zailduz eta auzoa geldiaraziz suntsitu nahi gaituzte”, salatu dute gaur Errotxapeako gaztetxeko kideek. Ohar batean azaldu dutenez, “ebazpen administratiboen aitzakipean maletak egitera behartuz eta gure proiektua ezkutuka desalojatuz” amaitu nahi dute duela ia hiru urte antolatzen eta eraikitzen hasitakoa. 2016ko irailean berreskuratu zuten urte luzetan hutsik egondako Artika kaleko lantegi zaharra.


Tarte horretan, auzolanean zaharberritu dute eraikina, eta “proiektu ezberdinak loratu ziren baso sendo bat errotu arte”. Identifikazioak eta isunak azkar iritsi ziren, ordea, eta 2017ko maiatzean asanbladako hiru kide epaitzen hasi ziren. Ekitaldiak egiteko ere traba ugari izan dituzte; urtarrilean, adibidez, bertso afari bat egitea debekatu zieten.


Guztiarekin ere, erasoen aurrean ekimenak antolatzen eta proiektua indartzen jarraituko dutela ziurtatu dute: “Ebazpenak ez du etengo gure garaipena”.


Besteak beste, hainbat gaztetxek, Erraki sareak eta GKSk dei egin dute klase elkartasunez  Errotxapeako gaztetxa defendatzera. Erraki: “Saretzeak bakarrik salba gaitzake”.