Denera, bederatzi langile kaleratu dituzte azken egunetan Aiaraldean. Batetik, Orozkon (Bizkaia) Artiach enpresak duen lantegian sei behargin kaleratu ditu zuzendaritzak. 6 eta 17 urte bitarte zeramaten lantegian lanean, baina aldi baterako Randstad enpresaren bitartez. Euren egoera salatzeko eta lan-baldintzak hobetzeko asmoz, Lan Ikuskaritzara jo zuten urte hasieran zazpi langilek.

Ikuskaritzaren ebazpenaren ostean etorri da zazpi horietatik sei kalera botatzeko enpresaburuen erabakia; enpresak aldi baterako kontratuen praktika arriskuan ikusi duenean, hain zuzen. Izan ere, bi ondorio nagusi barnebiltzen ditu ebazpenak: Artiachen behin-behinekotasun handia dagoela (lan-hitzarmenean jasotakoa baino handiagoa), eta zazpi behargin horiei kontratu mugagabea egin behar zaiela.

Bestalde, Laudioko (Araba) Maderas de Llodio enpresan ere hiru langile kaleratu dituzte. Irailaren 27an izan zen kaleratzea, "errendimenduaren beherakada" eta "diziplina haustea" argudiatuta. Kaleratutako beharginen ordezkari batek Aiaraldea-ri adierazi dionez, kaleratzea "gezurretan oinarrituta" dago, eta "ez dago inolako arrazoirik enplegu suntsiketa hori justifikatzeko". Duela urtebete erosi zuen Garnika taldeak aipaturiko lantegia.

Bi kasu, dependentziaren hamaika aurpegi

Artiacheko langileek azaldu dutenez, enpresako nagusien "irainak, degradazio pertsonalak eta erasoak" jasan behar izan dituzte azken urteetan. Bestalde, salatu dute euren aldi baterako egoerak sortutako ezegonkortasuna muturrera eraman izan dutela enpresaburuek; esaterako, lanera sartzeko unea baino orduerdi lehenago jakinaraziz lanaldiko ordutegia, edota bajak ez errespetatuz.

Laudioko kasuan, berriz, langileek zuzendaritzarekin egindako adostasunak sistematikoki hautsi dituzte zuzendaritzako kideek. Adibidez, duela urtebete Garnika taldeak lantegia erosi zuenean, kaleratzerik ez zela egongo zin egin zuten. Horren ostean ere, lan-karga jaitsi zenean, hainbat neurri adostu zituzten bi aldeek, kaleratzeak ekiditeko. Horri guztiari, ordea, entzungor egin dio zuzendaritzak.

Artiacheko zein Maderas de Llodioko kasuetan, langileek derrigorrez onartu behar izan dituzte lan-baldintzak eta modu horretan lanean jarraitzea. Laudion, adibidez, ostiraletan lanik ez egitea onartu behar izan zuten kaleratzeak eragozteko; Orozkon, aldiz, irain eta degradazio pertsonalen gainetik, aldi baterako kontratuak sinatzen jarraitu dute, zenbait kasutan, 17 urtez. 

Langileak borrokarako prest

Orozkoko lantokiko sei beharginek adierazi dutenez, "ahal den guztia" egiten jarraituko dute "urte luzez aldarrikatu dutena" defendatzen jarraitzeko. Prozesu judizial bat dute aurretik orain; epaiketa bat izango dute langile bakoitzeko.

Maderas de Llodioko langileek ere borrokarako asmoa azaldu dute. Gaurko eta astelehenerako elkarretaratzeak deitu dituzte enpresaren atarian, 13:00etatik 15:00ak arte.