Espainiako Poliziako agente bat, Alvaro Gaztelu Alcaire, bi urtez egon zen infiltratuta Lleidako mugimendu sozialetan eta ezker independentistako mugimenduetan, "Joan Llobet Garcia" izen faltsua bere eginda. La Directa hedabidearen ikerketaren arabera, polizia-agentea 2019ko irailean aurkeztu zen lehenengoz Ateneu Cooperatiu La Baula zentroan, eta, hortik aurrera, Sindicat d'Estudiants dels Països Catalans (SEPC) sindikatuan eta Endavanteko sektore ekologistan sartu zen. Prozesu independentistaren epaiaren aurkako mobilizazioetan eta Pablo Hasel rap-abeslariaren atxiloketaren kontrako protestetan parte hartu zuen, besteak beste.

Bere nortasun faltsuari sinesgarritasuna emateko, agenteak pisu bat hartu zuen alokairuan Lleidan, eta Escola del Treball zentroko Hezkuntza eta Ingurumen-Kontroleko heziketa-ziklo batean matrikulatu zen. Banku-kontu bat ere ireki zuen, gimnasio batera joan zen eta presentzia aktiboa izan zuen hainbat erakundetan. La Directa egunkariak jasotako testigantzen arabera, infiltratua lehen lerroan egon zen protestetan eta Poliziarekin izandako hainbat konfrontaziotan. "Ziur nago harriak jaurti eta barrikadak altxatzen zituela", jakinarazi du bere ikaskide batek.

Kasuaren berri izateak erreakzioak eragin ditu kaltetutako kolektiboen artean. La Baulako bozeramaile Maria Taribók adierazi du Espainiako Estatuak "zuzenean erasotzen" diola "herri-antolakuntzari"; eta Endavanteko Borja Garciak azpimarratu du "infiltrazio bat gehiago azaleratzea" lortu dutela, "inteligentzia kolektiboaren indarra erakutsiz". Alerta Solidàriak iragarri du Gaztelu Alcaire agentearen eta bere nagusien aurkako ekintza legalak aztertuko dituela, eta, aldi berean, 21 kolektibok salatu dute Lleidako Udalak uko egin diola hiriko mugimenduetako infiltrazioei buruz hitz egiteari.