Atzo agortu zen automobilgintzako enpresak ezarritako azken lan-erregulazioa, eta kaleratze kolektibo erraldoi bat iragarri du zuzendaritzak. 900 behargin aritzen dira Basauriko fabrikan.
ARGAZKIA / Cadena Ser
Bridgestone multinazionalak 335 langile kaleratu nahi ditu Basauriko (Bizkaia) lantokian. 2023aren bukaeran lan-erregulazioko espediente bat ezarri zuenetik ziurgabetasuna izan da nagusi, etenaldiekin izan arren, plantilla ordutik baitago enplegu-erregulazioan. Indarrean sartutako azken espedientea atzo agortu zen, eta txarrak dira horren osterako aurreikuspenak: kaleratze kolektibo erraldoi bat ezarri nahi du enpresa-zuzendaritzak.
Pneumatikoak ekoizten dituzte Basauriko fabrikan, eta 900 bat beharginek jarduten dute gaur egun. Hala ere, zuzendaritzak bere asmoekin aurrera jarraitzen badu, herena baino gehiago botako dituzte laster. Enpresak "gurpilen Europako merkatuan izaten ari diren aldaketak" hartu ditu aitzakiatzat kaleratzeak justifikatzeko, esan baitu konpainiaren "ekoizpen-egitura moldatu" beharko duela.
Basauriko lantegiaz gain, Usansolon (Bizkaia) eta Puente San Miguelen (Kantabria) ere beharginek 120 egun daramatzate lan-erregulazioan. Azken horretan ere kaleratze masibo bat iragarri du zuzendaritzak: 221 behargin bidali nahi ditu kalera.
