Hilabete geratzen da aurtengo Maiatzaren Lehenerako, eta, oraingoan ere, Bilbon (Bizkaia) egin du mobilizazio deialdi bat Euskal Herriko Kontseilu Sozialistak (EHKS). Aurten, "gerra inperialistaren eta Europako estatuen berrarmatzearen aurka" mobilizatzera deitu du nagusiki. Izan ere, kezkaz azaldu du "estatuen gaitasun militarrak areagotzeko planak bultzatzen" ari direla Europar Batasuneko herrialde guztietan, "defentsa edo Europaren 'autonomia estrategikoa' bermatzea" aitzakiatzat hartuta. "Horri guztiari aurre egiteko beharra azpimarratu nahi dugu, eta Maiatzaren Lehena horretarako erabiliko dugu", dio EHKSk.

Mugimendu Sozialistako antolakunde nagusiak kezkaz erreparatu dio Europar Batasunaren bide-orria markatzen ari den  agenda belikoari. Uste du EB "are desplazatuagoa geratzen" ari dela "mundu-mailako joko-zelai politikoan", eta AEBek "Europako eta Ukrainako gerra finantzatzera" bideratutako diru-inbertsioak zalantzan jarri dituen honetan, erantzun garbia eman dutela EBko agintariek: "biderkatu egin dira Europako estatuak berrarmatzeaz eta bere 'autonomia estrategikoaz' diharduten planak".

EHKSk, baina, horren iruzurraz ohartarazi du. Argitu du EBk "AEBen eta NATOren mandatuari lotuta" jarraituko duela "ekonomikoki, politikoki eta militarki"; eta, gainera, "balizko autonomia estrategikoa" eskuratuta ere, "Europa burujabeak potentzia kapitalista, inperialista eta militarista izaten" segituko lukeela eta hori ez litzatekeela "ezeren irtenbide" izango "langile-klasearen ikuspegitik". Hori gutxi balitz, antolakundeak iritzi dio, "segurtasuna areagotu" ordez, kontrakoa lortuko duela EBk bere berrarmatze-planekin, "mehatxu gisa" ikusiko dutelako "Europako mugez haragoko" gobernuek eta horrek "harremanak tenkatuko" dituelako.

Gorakada belikoa eta murrizketa sozialak eskutik, kapitalismoa eta gerra eskutik

EHKSk nabarmendu duenez, berrarmatzea "Europako ekonomia hondoratzen ari den egoera batean" izaten ari da, eta Errusiaren aurkako gerrak "egiturazkoa den krisialdi ekonomikoan sakontzea eragin du, horniduraren prezioen garestitzea dela-eta, besteak beste". Automobilgintza bezalako sektoreak krisi betean dauden bitartean, "oligarkia atlantistaren armagintza-negozio pribatua finantzatzeko" mugimenduak egiten ari dira agintariak, eta horrek bi eragin nagusi izan ditzake EHKSren ustez: "gerrarako arriskua" areagotzea eta "murrizketak" arlo sozialean. Zentzu horretan, Euskal Herrian dauden berehalako zereginen artean, antolakundeak beharrezkotzat jo du "euskal industriaren berregituraketa militaristaren aurka egitea" eta "kaleak hartzea".

Gastu militarraren gorakada eta murrizketa sozialak eskutik doazen modura, "kapitalismoa eta tentsio beliko inperialistak" ere eskutik doazela nabarmendu du antolakundeak, bestalde. "Kapitalismoaren historiak erakutsi digu krisian dauden bloke inperialistek industria militarraren garapenerantz, gerrarantz eta txikiziorantz jotzen dutela", jakinarazi du: "Kapitalismo baketsu baten ideia ameskeria baino ez dela frogatuta dago".

Europar Batasunaren autoritarismoa ezkutuan

Gerrarako gastua handitzeko urrats erraldoiak egiten jarraitzen duten bitartean, "estatuen militarizazioa" legitimatzeko "ofentsiba kulturala" hedatu dute EBko agintariek, EHKSren esanetan. Eta gogorarazi du, gainera, "estatuen militarizazioak eskubide politikoen urraketan eta autoritarismoan sakonduko" duela eta "Europako agintarien izaera ez- demokratikoa eta autoritarioa azaleratzen" ari dela, Ukrainan eta Errumanian ikusten ari den modura. "Putinen aurka egiteko argudioetako bat haren ustezko diktadore izaera da, baina berdin ekiten dute Europako estatuek", dio Mugimendu Sozialistako antolakundeak: "Jendartearen bizkarrera presidenteak jarri, kargugabetu, hauteskundeak baliogabetu, konstituzioak moldatu edo manipulazio kanpainak gauzatzen dituzte".

Arku parlamentario osoa bat eginik

Era berean, gorakada beliko bete-betean, "beharrezkoa" denean "arku parlamentarioko alderdi guztiek" berrarmatzea babestuko dutelakoan dago EHKS. "Bakoitza bere argudioak erabiltzen ari da estrategia hori justifikatzeko", xehatu du: "Batzuek diskurtso atlantista mantentzen dute; beste batzuk Europaren autonomia estrategikoaz ari dira; eskuin muturreko zenbait alderdik nazioen burujabetzaren bitartez justifikatzen dute estatuen militarizazioa, eta abar".

Espainiako Estatuan, alderdi politiko guztiak "estatuen militarizazioa sustatzen" ari direla dio EHKSk; "PSOEtik hasi, EAJtik pasatu eta Voxeraino". Eta salatu du, horrez gain, "Europar Batasunaren militarizazio-planaren aurka mintzo diren alderdi sozialdemokratek ere, EH Bilduk kasu, berau bermatuko dutela egoerak beren baiezko botoa eskatzen duenean". Argi abisatu du EHKSk: "Sanchezen agintaldia babesteak estatuen militarizazioan sakontzea inplikatzen du nahitaez".

Frantziako Estatuari dagokionez, "eskalada militarista europarrean" buru izan nahi duela nabarmendu du antolakundeak, gobernuaren asmoa "arma-industria hauspotzea eta bere barne-gatazkak baretzea" izan daitekeela ulertuta. "Berrarmatzearen beharra azpimarratzeaz gain, etengabe ari dira hitz egiten euren aberriaren defentsaz eta gazteria gerrarako prestatzearen beharraz, zerbitzu militarra berriz ezartzea aipatzeraino", ekarri du gogora: "Frantziako Estatuan ere, gerrarekiko oposizio erreala bilatzen duenak, nekez aurkituko luke hura arku parlamentarioko alderdien artean".

Langile-klasearen batasuna gerraren kontra

"Gerrari eta estatuen berrarmatzeari aurre egiteko", EHKSk esan du ezinbestekoa dela "langile-klaseko antolakundeen, kolektiboen eta norbanakoen batasuna". Baina xehatu du "sozialdemokrazia kanpoan utzita" egin behar dela hori, eta "iruzur instituzionaletik eta beren alderdietatik kanpo": "Estatuen militarizazioaren aurkako oposizioa kaleetan antolatu behar dugu, komunikabide nagusien eta instituzioen engainutik aparte".

Mugimendu Sozialistako antolakunde nagusiak ohartarazi du, hala, "gerrari eta langile-klasearen pobretzeari aurre egingo dion erreferente iraultzaile bat eratzea" beharrezkoa dela, "nazioartean hedatuta eta herrialde bakoitzean sustraituta" egongo dena. "Maiatzaren Lehenean kontrakotasun hori guztia agerian uzteko ardura daukagu, baita sozialismoaren norabidean urrats bat gehiago ematekoa ere", gehitu du EHKSk: "Jendarte komunista baten eraikuntza da gerrarik eta zapalkuntzarik gabeko mundu baterako bermea".