Irunen (Gipuzkoa), etxegabetua izateko arriskuan dago familia bat. Adin txikiko sei lagun dira sendian. Irungo Udalaren larrialdi-etxebizitza batean bizi dira une honetan, baina handik bota nahi ditu udalak, bizitoki-alternatiba egokirik ziurtatuta ez eduki arren.
Egoeraren berri eman eta protestara deitu zuen Bidasoko Kontseilu Sozialistak. Aurreko ostiralean, abuztuaren 30ean, kontzentrazio bat egin zuen Irungo San Juan plazan: "familiaren beharretara egokitutako etxebizitza-alternatiba bat" exijitu zuten elkarretaratzean, eta etxegabetze ororen kontra agertu ziren.
"Kasu honek erakusten du horrelako egoerei aurre egin ahal izateko modu bakarra dela etxebizitzarako sarbide unibertsala bermatuko duen gizarte-eredu baten aldeko antolakuntza eta borroka", esan zuten Kontseilu Sozialistako kideek. Hala, hurrengo deialdietara adi egoteko eskatu zuten.
