Aurreko astean bete ziren hamasei urte polizia-agente batek Alexandros Grigoropoulos erail zuenetik, Atenasen. 2008an, Exarchia auzoan, tiroz hil zuen 15 urteko gaztea Poliziak. Aurreko ostiralean, milaka pertsonak parte hartu zuten urteroko manifestazioan, Grezian hamarkadatan izan den matxinadarik handienetako bat eragin zuen hilketa gogoratzeko.

Ohi bezala, manifestarien eta polizia-indarren arteko liskarrekin amaitu zen protesta. Tokiko komunikabideek jakinarazi dutenez, pertsona batzuek su eman zieten zakarrontzi batzuei eta molotov koktelak eta harriak jaurti zituzten istiluen aurkako polizien aurka, eta besteak beste gas negar-eragileekin erantzun zuten haiek.

Tentsioa Grigoropoulos hil zuten auzo berera ere hedatu zen, Exarchiara, bere jarduera politiko anarkistagatik ezaguna den eremura. Greziako Poliziak milaka agente bidali zituen Atenasko erdialdera, eta iturri batzuek esan zuten 60 inguru izan zirela atxilotuak. Liskarrek egunean zehar jarraitu zuten, eta manifestari batzuk Exarchian bildu ziren protestaren amaieran. Poliziak etxebizitza-eraikinetan miaketak egin zituen, eta ateak behera bota zituen hainbat lekutan, "zalapartarien bila".

Gertaera horiek 2008ko istilu masiboak gogorarazten dituzte, protestak, grebak, istiluak eta suteak barne, Grigoropoulosen erailketaren ondoren hilabete iraun zutenak. Gertakariek nazioarteko elkartasun-oldea eragin zuten, eta kalte ugari eragin zituzten Greziako enpresen eta gobernu-azpiegituren aurka, milioika eurokoak.

2008ko azaro horrek arrasto sakona utzi zuen Greziako gizartean, bereziki gazterian eta mugimendu anarkistetan. Harrezkero, urtero errepikatu dira protestak, eta agerian geratu da Poliziaren jarduerak eta herrialdeko egoera sozialak sortutako atsekabe orokorra. Atzoko egunak, tankerako beste batzuek bezala, liskarrak utzi ditu, baina baita gobernuaren errepresio gogorra ere, istiluak ohiko eremuetatik haratago zabal ez zitezen.