2021ean, 68 izan ziren Euskal Herrian zenbatutako lan-heriotzak. "Ez traumatikoak" izan ziren 2022ko heriotzetatik 23, eta eraikuntza sektorean gertatu ziren "traumatikoetatik" hamahiru.
Iturri sindikalen arabera, 2022. urtean, 2021. urtean baino lan-heriotza bat gehiago izan zen Euskal Herrian: 69, hain zuzen ere. Euskal Herrian bertan izandako lan-istripu hilgarriak nahiz behin-behinean Euskal Herritik kanpo lanean ari ziren beharginek jasandakoak barne hartzen ditu zenbaketak; zehazki, 65 gertatu ziren Euskal Herrian eta lau Euskal Herritik kanpo.
2022an atzemandako 69 lan-heriotzetatik, 23 izan ziren "ez traumatikoak" direlakoak; alegia, beharginak lanean ari zirela bihotzekoak jota, konortea galduta, eta abar. Bestalde, sei heriotza izan ziren in itinere; lanera bidean edo lanetik bueltan.
Heriotza "traumatiko" modura sailkatutakoen barruan, eraikuntza sektorean izandakoak nabarmentzen dira: hamahiru. Toki altuetatik erorita galdu zuten bizia behargin horietatik gehienek; 11 langilek, hain justu. Aurreneko sektorean, berriz, zortzi langile hil ziren 2022an soldatapean lanean ari zirela.
2008. urtetik hona, gutxienez 968 lan-heriotza izan dira Euskal Herrian, iturri sindikalek diotenez.
