200 gizarte-langilek bat egin dute etxebizitzaren negozioaren aurka

Aktualitatea / APIRILAK 5: ETXEBIZITZAREN NEGOZIOARI EZ

Manifestu bat sinatu du esku-hartze sozialeko langile andanak, eta larunbat honetan Donostian mobilizatzera deitu dute.

Gizarte-arloko langileen adierazpena etxebizitza-negozioaren aurka

2025/04/01 08:05

Gizarte-arloko langileen adierazpena etxebizitza-negozioaren aurka. Izenburu hori darama Euskal Herriko 200 gizarte-langilek idatzi eta sinatu duten manifestuak, datorren larunbatean Donostian (Gipuzkoa) izango den mobilizazioa babestuz. Izan ere, Euskal Herriko Etxebizitza Sindikatu Sozialistak manifestazio bat antolatu du apirilaren 5erako, etxebizitza-eskubide unibertsalaren alde, eta deialdiarekin bat egin dute esku-hartze sozialean jarduten duten ehunka langilek.

"Egunero, etxebizitzaren negozioak langile-klaseko kolektibo zaurgarrienetan dituen ondorioen lekuko gara. Egungo krisi-testuinguruan modu dramatikoan handitzen ari da gizarte-zerbitzuen zein, oro har, hirugarren sektore sozialeko baliabideetara jo behar duten pertsonen kopurua", diote manifestuan: "Etxebizitzaren prezioaren igoerak gero eta gehiago pobretzen du langile-klasea, errentisten eta enpresarien etekinak handitzen dituen bitartean".

Baliabide falta, egiturazkoa

Egoera horretan, baina, "pobretze horri aurre egiteko instituzio publikoek duten egiturazko baliabide faltaz" ohartarazi dute: "Larrialdietarako etxebizitzen eskasia, adingabeen zentroen itxiera, gizarte-bazterketaren aurkako laguntzen murrizketa, DSBE (RGI) bezalako gizarte-prestazioen murrizketak...". Salatu dute, hain zuzen ere, "bazterketa egoeran dauden pertsonen kopuruak gora egiten duen bitartean", murriztu egin dituztela "egoera horiei erantzuteko baliabide publikoak", eta horrek esku-hartze sozialeko lanari ere eragin diola: lan-baldintzek okerrera egin dute, lan-karga handia da eta zerbitzua kaskartu egin da, haien esanetan.

Pobreziaren kriminalizazioa

Hori guztia gutxi balitz, manifestua sinatu duten beharginek gaineratu dute euren "lanaren izaera aldatzen" ari dela, "egiturazko baliabide faltari laguntza sozialak jasotzen dituztenen kriminalizazio kultural eta instituzionalarekin erantzun" zaiolako. "Gizartean zentzu komun bat ezartzen ari da, zeinaren arabera Estatuaren laguntza merezi dutenak eta merezi ez dutenak bereiztea litzatekeen gizarte-zerbitzuen eginkizuna", zehaztu dute: "Gure lanari bere akonpainamendu izaera murriztu eta gero eta konpetentzia kontrolatzaile eta diziplinatzaile gehiago esleitzen zaizkio".

Sinatzaileek argitu dute, ordea, haiek ez dutela "kriminalizazio-estrategia horretan parte hartu nahi", iritzita "estrategia horren eginkizun bakarra pobretzearen benetako arrazoiak eta baliabide falta etengabea ezkutatzea" dela. "Ulermen marko horrek jarrera erreakzionarioak elikatu baino ez du egiten, gizartean arrazismoa eta klasismoa hedatuz", azpimarratzen dute.

Etxebizitzaren negozioaren kontra

Eta manifestua biribiltzeko, 200 gizarte-langileek salatzen dute "higiezinen negozioaren ondorio zuzena" direla "milaka pertsonak pairatzen dituzten arazo asko" eta "inola ere ez kaltetutako pertsonen erantzukizun pertsonala"; hala nola "etxegabetzeak, emantzipatzeko ezintasuna, tratu txar egoeretatik atera ezin izatea etxebizitzarik ez izateagatik...". Horregatik esan dute "ezinbestekoa" dela "pobrezia eta gizarte-bazterketa gero eta kopuru handiagoetan sortzen dituen etxebizitzaren negozioarekin amaitzea"; eta aldarrikatu dute, "murrizketen eta kriminalizazioaren aurrean, kalitatezko bizi-baldintzetarako sarbide unibertsala ahalbidetuko duen gizarte-eredu berri baten alde" egiten dutela.

Sinatzaileak

Ondoko langileek egin dute bat manifestuarekin: