Donald Trumpek bart iragarri duenez, Irango Errepublika Islamikoaren aurkako erasoak eta bonbardaketak bertan behera uzteko agindu du, "bi asterako". Bere sare sozialetan zabaldutako ohar baten bidez, agintari estatubatuarrak "aldebiko su-etentzat" jo du neurria, eta hasierako helburu militarrak "lortuak eta gaindituak" izan direla adierazi du. Erabakia Trumpen "ultimatuma" amaitu baino ordubete lehenago atera da argitara. Epea amaitzean Irango azpiegitura kritikoak suntsitzeko mehatxua egin zuen berez, "zibilizazio oso bat gaur gauean hilko" zela ohartaraziz.
AEBek iragarritako su-etena Shehbaz Sharif Pakistango lehen ministroak eta Asim Munir Pakistango Estatu Nagusiko buruak zuzendutako azken orduko bitartekaritzaren ostean etorri da. Al Jazeera-k eta Tehran Times-ek jasotako iturri ofizialen arabera, Teheranek bidalitako "hamar puntuko proposamen bat berrikustea" onartu dute AEBek. Iranen planak, besteak beste, honako hauek biltzen ditu: eraso guztiak amaitzea; zigor ekonomikoak erabat kentzea; Israelen erasoak bertan behera geratzea, Hezbollahren aurkakoak barne; eta otsailaren 28an estatubatuarren eta israeldarren koalizioak hasitako bonbardaketen ondoren, herrialdea berreraikitzeko laguntza finantzarioa jasotzea.
Bestalde, Irango Kanpo Arazoetako ministro Seyed Abbas Araghchik esan du bere indar armatuek "defentsa-operazioak bertan behera" utziko dituztela, lurraldearen aurkako erasoak gelditzen badira. Irango Segurtasun Nazionaleko Kontseilu Gorenaren izenean igorritako ohar batean, Araghchik eskerrak eman dizkie Pakistango bitartekariei, eta baimena eman du bi aste hauetan Ormuzko itsasartean "igarotze segurua" ahalbidetzeko, "Irango Indar Armatuekin zuzenean koordinatuta".
The New York Times-en esanetan, Iranen proposamenak, gainera, 2 milioi dolar inguru kobratzea aurreikusten du bidetik igarotzen den merkataritza-ontzi bakoitzeko. Horrela, bere baliabideen kontrol materiala bermatuko du, lehengo blokeoaren aurrean. Irango Gobernuak bermeak ere eskatu ditu, idatziz, etorkizuneko eraso posibleen aurka, eta Trumpek dio "iraganeko desadostasun ia guztiak" adostu dituztela jada. Hamalau eguneko epeari esker, Ekialde Hurbilerako behin betiko bake-akordio bat "amaitu eta gauzatu" ahal izango dela gaineratu du AEBetako buruak, Islamabaden sinatuko litzatekeena bi aste barru. "Iran gudu-zelaian nagusi denez eta etsaiak mehatxuen bidez jarraitzeko gaitasunik ez duenez, negoziazioak izango dira Islamabaden. Hamabost egun barru, Iranen garaipenaren xehetasunak elkarrizketa politikoetan gauzatuko dira", aurreratu du Segurtasun Nazionaleko Kontseilu Gorenak.
Bestalde, Etxe Zuriaren presioaren ondorioz, Israelek berretsi du bat egingo duela aldi baterako etenarekin. Dena den, Israelgo 12. kanalak seinalatu du su-etena ez dutela begi onez ikusi Tel Aviven. Eskualdean nagusitu den tentsio handiko une batean iritsi da geldialdia, Israelgo Estatuak, Qatarrek eta Saudi Arabiak misilak atzeman baitituzte azken unera arte, eta protestak izan baitira Teherango eta Bagdadeko kaleetan. Hainbat erakundek salatu dutenez, Trumpek Irango zibilizazioarekin amaitzeko egindako mehatxuak 90 milioi pertsona baino gehiagoren aurkako genozidioa gauzatzea ekar lezake. Iragarpena gorabehera, mesfidantzak bere horretan dirau Irango agintari militarrengan eta goi-funtzionarioengan.
