Ikasle Abertzaleek Hego Euskal Herriko hiriburuetan zein Eibarren egingo diren manifestazioetara bertaratzera dei egin dute, "langile sektore ezberdinen arteko batasuna" helburu. Gasteizen gazte zutabean hartuko dute parte ikasleek, eta Bilbon, gazte eta ikasle blokean. Ia bi urtez jardun dute borrokan pentsionistek, eta datorren urteko Greba Orokorraren harira antolatu dituzte asteburuko mobilizazioak.
Pentsiodunen manifestazioa Bilbon. Argazkia: Berria
Ikasle Abertzaleek bat egin dute pentsiodunen mugimenduak datorren larunbaterako, azaroak 16, antolatu dituen mobilizazioekin. "Langile klasearen batasuna" azpimarratuz, bere egin du ikasle antolakundeak "pentsio duinen" aldeko aldarrikapena. Zentzu horretan, dei egin du asteburuko manifestazioetara bertaratzera.
Deustun (Bilbo, Bizkaia) 17:30ean Done Petri
plazatik abiatuko da gazte eta ikasle blokea, eta Gasteizen (Araba), 17:45ean Hala Bedin bilduko da gazte zutabea. Bilboko manifestazio orokorra osatuko duten
zutabeetako batekin elkartuko da ikasle eta gazte blokea gero, eta gainontzeko zutabeek Gran Via, Zabalburu
eta Arenaletik ekingo diote ibilbideari. Gasteizi dagokionez, Bilbo plazan hasiko den
manifestazioarekin batuko da gazte zutabea.
2020. urtean Euskal Herrian egingo den Greba
Orokorrari begira antolatu ditu asteburuko mobilizazioak pentsiodunen mugimenduak. Hiriburu guztietan eta Eibarren (Gipuzkoa) izango dira
manifestazioak. Gasteizko eta Bilboko deialdiez gain, beraz, hitzorduak jarri dituzte Donostian (Gipuzkoa), 17:00etan Bulebarrean; Iruñean (Nafarroa), 17:00etan Sarasaten; eta Eibarren, 12:00etan Unzaga plazan.
Bi urte martxan
Ia bi urtez jardun dute borrokan pentsionistek. Besteak beste, astelehenero egiten dituzte elkarretaratzeak Euskal Herriko hainbat udalerritan, eta udako geldialdiaren ostean, martxa bat egin zuten Madrilera.
