Osasun-sare publikoan emango lituzkete injekzio horiek, obesotzat jotako langabeek lanen bat lortzen dutela ziurtatzeko.
Keir Starmer Erresuma Batuko lehen ministroak aste honetan izan du hizpide "ekonomiarentzat onuragarria" izango omen den neurri bat: obeso modura identifikatutako pertsona langabeei argaltzeko injekzioak ematea, soldatapeko lanen batean har ditzaten. "Uste dut medikamentu hori oso garrantzitsua izan daitekeela gure ekonomiarentzat eta osasunarentzat", esan du ministroak.
Osasun-sare publikoak kudeatu eta emango luke argaltzeko farmako hori. Gaur-gaurkoz, osasun-arazoak dituzten pertsona obesoei eta diabetesa pairatzen dutenei baino ez diete ematen . Gobernuaren asmoa da, baina, erabilera zabaltzea. Eta, momentuz, lanik gabeko pertsonak aipatu ditu.
"Obesitateak eragindako gaixotasunen ondorioz, batez beste, urtean lau egun gehiago hartzen dira [bajan] gaixotasunagatik. Eta beste askok, berriz, lanik gabe geratu behar izaten dute", adierazi du Starmerrek.
Argaltzeko farmakoaren zabalpenari begira, Mounjaro medikamentua ikertzen ari omen da Lilly farmazia-konpainia. Berak ekoizten du. Azken azterketen arabera, farmako hori jaso duten pertsonek euren gorputz-pisuaren %21 galdu dute 36 astean.
